Исроил ва Фаластиннинг ҲАМАС ҳаракати ўртасида Ғазода ўт очишни тўхтатиш бўйича музокаралар Қоҳирада натижасиз якунланди. Бу ҳақда Миср разведка хизматларидаги манбаларга таяниб, Reuters хабар берди.
Нашр суҳбатдошларига кўра, 25 август куни Миср пойтахтида бўлиб ўтган музокараларда Исроил ва ҲАМАС воситачилар таклиф қилган барча муросали ечимларни рад этган.
Шу билан бирга, юқори мартабали америкалик расмий музокаралар конструктив бўлганлигини айтиб, томонлар “якуний ва реал келишувга” эришиш истагини билдирганини маълум қилган. Расмий, шунингдек, қолган масалаларни ҳал қилиш бўйича иш яқин кунларда давом этишини, ишчи гуруҳлар Қоҳирада қолишини айтган.
Исроил ва ҲАМАС ўртасида ўт очишни тўхтатиш ва гаровга олинганларни озод қилиш бўйича музокаралар АҚШ Марказий разведка бошқармаси директори Уилям Бернс, Қатар бош вазири Муҳаммад бин Абдулраҳмон Ол Тани ва Мисрнинг юқори мартабали расмийлари иштирокида бўлиб ўтган.
Музокаралар муваффақиятсизликка учрагани ҳақидаги хабарлар ортидан АҚШ мудофаа вазири Ллойд Остин минтақада иккита авиаташувчи зарба берувчи гуруҳнинг мавжудлигини узайтиришни буюрган. У бу қарорини Исроил мудофаа вазири Йоав Галант билан телефон орқали мулоқоти чоғида маълум қилган.
“Вазир Исроилнинг ўзини ўзи мудофаа қилиш ҳуқуқини ҳамда АҚШ Исроилнинг Эрон ва унинг минтақавий иттифоқчиларига қарши мудофаасини қўллаб-қувватлашини давом эттиришини яна бир бор тасдиқлади. Бу қўллаб-қувватлашнинг бир қисми сифатида у минтақада иккита авиаташувчи ҳужум гуруҳини ушлаб туришни буюрди”, дейилади Пентагон баёнотида.
Изоҳ (0)