Қатар ҳукумати Ғазо секторидаги можарони ҳал қилиш учун воситачилик ҳаракатларини давом эттирмоқда, бироқ маслаҳатлашувлар доирасида жиддий ўзгаришлар рўй бермади. Бу ҳақда Қатар ТИВ расмий вакили Мажид бин Муҳаммад ал-Ансорий брифингда маълум қилди.
“Ҳозирча ҳеч қандай янгилик йўқ. Саъй-ҳаракатлар ҳали ҳам давом этмоқда, музокаралар олиб бориляпти”, деди ал-Ансорий. Унинг сўзларига кўра, “барча воситачилар ҳозирда ушбу келишувга эришиш учун қўлларидан келганини қилмоқда”.
15-16 август кунлари Доҳада Ғазо секторида ўт очишни тўхтатиш ва Фаластиннинг ҲАМАС ҳаракати томонидан гаровга олинганларни озод қилиш бўйича музокаралар бўлиб ўтди.
Шундан сўнг, Миср, Қатар ва Америка Қўшма Штатлари қўшма баёнот бериб, маслаҳатлашувлар ижобий муҳитда ўтганини қайд этди. Музокараларнинг янги босқичида Қўшма Штатлар Қатар ва Миср кўмагида ҲАМАС ҳамда Исроил ўртасидаги келишмовчиликларни камайтириши мумкин бўлган таклифни тақдим этди. Бироқ ҲАМАС Америка ташаббуси фақат Исроил манфаатларини ҳисобга олганини айтиб, келишивга рози бўлмади.
25 август куни Миср пойтахтида маслаҳатлашувларнинг навбатдаги раунди бўлиб ўтди. ҲАМАС матбуот котиби Иззат ал-Ришқнинг айтишича, ҳаракат делегацияси Миср ва Қатар воситачилари билан учрашувлардан сўнг Қоҳирадан жўнаб кетган. Унинг сўзларига кўра, ҲАМАС вакиллари Исроилдан 2 июль куни келишиб олган шартларни бажаришни талаб қилган.
Воситачилик бўйича ишчи гуруҳлар 28 август куни Доҳада яна йиғилиш ўтказишди. 7 август куни Марказий разведка бошқармаси директори Уилям Бернс АҚШ яқин кунларда Ғазо секторида сулҳга эришиш бўйича батафсил таклифларни тақдим этишини айтганди. Аммо ҳозирча бу музокаралар самара бермаяпти.
Изоҳ (0)