“Ҳаддан ташқари бўрттирилган иттифоқ” — Байден Хитой ва Россия яқинлашувини баҳолади

АҚШ президенти Жо Байденнинг фикрича, Хитой ва Россия ўртасидаги иттифоқ ғояси жуда бўрттирилган. Бу ҳақда у Оттавада Канада бош вазири Жастин Трюдо билан қўшма матбуот анжуманида гапирди.

Байденнинг сўзларига кўра, АҚШ ва Канада сингари давлатларгина алянсларни кенгайтирмоқда.

“Айтинг-чи, Хитой Россия олдида муайян муҳим мажбуриятларни зиммасига олганини аслида қандай кўряпсиз? Улар иқтисодий жиҳатдан қандай мажбуриятларни олиши мумкин?”, — деди Байден.

Айни пайтда журналист АҚШ президентининг сўзини бўлиб, Хитой ва Россия ўртасидаги савдо ҳажми ошганини айтди.

“Уларнинг савдоси нима билан таққослаганда ўсди?”, — саволга жавобан сўради Байден.

АҚШ президентининг ишонтириб айтишича, агар Хитой ва Россия чиндан ҳам коалиция тузса, Ғарб янада кўпроқ давлатларни бирлаштиради.

“Мен Хитойга ҳам, Россияга  ҳам енгил қарамайман. Лекин биз бўрттириб юбордик, деб ўйлайман. Охирги уч ойдан бери Хитой Россияга жиддий қуроллар бермоқчи, деган гапни эшитяпман. Улар ҳали буни амалга оширгани йўқ. Бу улар ҳали бундай қилмайди, дегани эмас, лекин ҳали қилгани ҳам йўқ. Агар бирор нарса юз берса, Ғарб анча кучлироқ бирлашади”, — деди Байден.

Бу борада Байден Хавфсизлик бўйича тўрт томонлама мулоқот (Қуад) мамлакатлари – АҚШ, Австралия, Ҳиндистон, Японияни назарда тутаётганини айтди. У алоҳида иттифоқлар АҚШ, Япония ва Жанубий Корея иттифоқи, шунингдек, АУКУС уч томонлама мудофаа формати: Австралия, Буюк Британия ва АҚШ ҳақида гапирди.

“Келажакда нима бўлишини ҳеч ким билмайди. Хитой ва Россия нима қиляпти, янада ёмонроқ нима қилиши мумкин — буни енгил қабул қилмайман. Лекин бунга узоқдан қараш керак. Биз бирлашган коалициямиз: АҚШ ва Канада”, — деди Байден.