АҚШ мудофаа вазири Пит Ҳегсет Пентагон разведка бошқармаси раҳбари ҳамда икки юқори мартабали қўмондонни лавозимидан озод қилди. Бу Дональд Трамп маъмурияти томонидан Пентагонда амалга оширилган навбатдаги тозалаш сифатида баҳоланмоқда.

Лавозимидан олинганлардан бири Ҳарбий разведка бошқармаси (DIА) раҳбари, генерал-лейтенант Жеффри Крусе бўлиб, унинг нима сабабдан ишдан бўшатилгани номаълум. Худди шу куни АҚШ денгиз флоти захира кучлари раҳбари ва Денгиздаги махсус операциялар қўмондони ҳам ўз курсисидан маҳрум бўлди.
АҚШ Сенатининг разведка қўмитаси раиси ўринбосари, сенатор Марк Уорнер Пентагон раҳбарининг мазкур қарорига муносабат билдириб, “разведка хизмати мамлакатни ҳимоя қилиш воситаси эмас, балки содиқлик синови сифатида кўрилаётгани”ни айтди.

Олдинги тозалашлар
Бу Трамп маъмурияти ҳарбий ва разведка тизимида олиб бораётган “тозалаш” жараёнининг навбатдаги босқичи сифатида баҳоланмоқда. Жорий йил апрель ойида президент Миллий хавфсизлик агентлиги (NCА) директори генерал Тимоти Хоуни ишдан олган, оқибатда Оқ уй Миллий хавфсизлик кенгашидан ўнлаб ходимлар кетказилганди.
Февралда эса Пентагон раҳбари Пит Ҳегсет Қўшма штаб бошлиқлари қўмитаси раиси, ҳаво кучлари генерали C.Қ. Браунни, беш нафар адмираллар ҳамда генералларни лавозимидан кетказган эди. Бу АҚШ ҳарбий эстаблишментидаги мисли кўрилмаган ўзгариш бўлди.
Крусе нега ишдан олинди?
Ҳарбий разведка бошқармаси раҳбарининг ишдан олинишига расмий сабаб кўрсатилмаган. Бироқ тахминларга кўра, бу қарор тузилманинг Эрон ядровий объектларига зарбалар натижаси бўйича тарқалган махфий ҳисоботидан сўнг қабул қилинган бўлиши мумкин. Ҳужжатда зарбалар Теҳрон дастурини атиги бир неча ойга ортга сургани айтилган эди. Бу Дональд Трампнинг объектлар “бутунлай йўқ қилингани” ҳақидаги баёнотига зид бўлиб чиқди.

Мазкур хулосанинг оммавий ахборот воситаларида тарқалиши АҚШ президентини ғазаблантирди. Оқ уй ҳисоботни “мутлақо нотўғри” деб атади, Трамп эса уни эълон қилган CNN, Nyu York Times ва бошқа нашрларни “сохта янгиликлар” тарқатишда айблади.
Крусе лавозимидан олингани ҳақидаги хабардан икки кун олдин АҚШ Миллий разведка бошқармаси директори Тулси Габбард 37 нафар амалдаги ва собиқ разведкачиларнинг хавфсизлик рухсатномаларини Трамп буйруғига асосланиб бекор қилган эди. Аввалроқ собиқ президент Жо Байден ва Трампнинг сайловдаги рақобатчиси Камала Ҳаррис ҳам шундай муносабатга дуч келган.
Изоҳ (0)