Ўзбекистон президенти томонидан 21 августда имзоланган қонун билан нодавлат нотижорат ташкилотлар фаолиятига ноқонуний аралашганлик учун жавобгарлик белгиланди.
Қонунчилик палатаси томонидан 2025 йил 15 апрелда қабул қилиниб, Сенат томонидан 30 апрелда маъқулланган қонун билан Маъмурий жавобгарлик тўғрисидаги кодексга ўзгартириш ва қўшимчалар киритилди.
Жумладан, кодекс 197-8-модда (нодавлат нотижорат ташкилотларининг фаолиятига қонунга хилоф равишда аралашиш) билан тўлдирилди. Унга кўра, давлат органлари мансабдор шахслари томонидан нодавлат нотижорат ташкилотларининг фаолиятига қонунга хилоф равишда аралашиш БҲМнинг 7 бараваридан 10 бараваригача (2 миллион 884 минг сўмдан 4 миллион 120 минг сўмгача) жарима солишга сабаб бўлади.
Худди шундай ҳуқуқбузарликлар маъмурий жазо чораси қўлланилганидан кейин 1 йил давомида такрор содир этилган бўлса, БҲМнинг 10 бараваридан 15 бараваригача (4 миллион 120 минг сўмдан 6 миллион 180 минг сўм) миқдорда жарима солишга сабаб бўлади.
Нодавлат нотижорат ташкилотлари (диний ташкилотлар бундан мустасно), шунингдек, уларнинг ваколатхоналари ва филиалларининг давлат рўйхатидан ўтмасдан (ҳисобга олинмасдан) фаолиятни амалга оширгани учун жаримарлар максилмал миқдори камайтирилди. Эндиликда бу БҲМнинг 15 бараваридан 25 бараваригача (6 миллион 180 минг сўмдан 10,3 миллион сўмгача) миқдорда жарима солишга сабаб бўлади. Илгари жариманинг юқори миқдори БҲМнинг 30 барварига (12 миллион 360 минг сўм) тенг бўлган.
Қонуннинг қабул қилиниши нодавлат нотижорат ташкилотларини давлат томонидан янада қўллаб-қувватлаш, уларнинг фаолият эркинлиги, ҳуқуқлари ва қонуний манфаатлари ҳимоя қилинишини таъминлашга хизмат қилади.
Изоҳ (0)