АҚШда президентлик сайловида ғалаба қозонган Дональд Трамп томонидан таклиф қилинган янги божлар глобал савдо тизимига путур етказиши мумкин.
Хусусан, бундай божлар Америка иқтисодиётининг муҳим тармоғи бўлган автомобиль саноатига жиддий зарар етказиш билан таҳдид қилмоқда, деб ёзади The Wall Street Journal.
Аввалроқ Трамп Канада ва Мексикадан товарларга 25 фоизлик, Хитойдан импорт қилинадиган маҳсулотларга эса 10 фоизлик божлар жорий этилишини эълон қилган эди. Truth Social’да берган баёнотида Трамп бу чоралар ноқонуний миграция ва наркотик воситалар, хусусан, фентанил етказиб бериш тўхтатилмагунча ўз кучида қолишини таъкидлади.
“Муаммо шундаки, бундай стратегия харажатсиз амалга оширилмайди ва ҳалокатли оқибатларга олиб келиши мумкин. Келинг, АҚШ автосаноатидан бошлайлик... Автомобиль бутловчи қисмлари ва хом ашё йиғиш жараёнида Шимолий Америка чегараларини бир неча марта кесиб ўтади. Ҳар бир чегарада божлар 25 фоиз бўлса, бу нархларни кескин оширади ва Қўшма Штатларда иш жойларини йўқотишга олиб келади. Бундан ташқари, жавоб чоралари хавфи мавжуд”, дейилади WSJ мақоласида.
Нашр, шунингдек, ушбу божларнинг киритилиши Трампнинг биринчи муддатида имзолаган АҚШ-Мексика-Канада савдо битимини (USMCА) бузиши мумкинлигини таъкидлайди. Трамп аввалроқ “АҚШ тарихидаги энг яхши келишув” деб атаган келишув давлатнинг ишончли савдо шерик сифатидаги обрўсини йўқ қилиши мумкин.
“Трамп божларни нафақат вақтинчалик музокаралар учун восита, балки бутун глобал савдо тизимини қайта қуриш учун дастак сифатида кўриши эҳтимоли бор”, деб қўшимча қилинади материалда.
WSJ таъкидлашича, бундай сиёсат зарар келтириши мумкин, айниқса, Қўшма Штатлар Хитой билан қарама-қаршиликда иттифоқчиларнинг ёрдамига умид қилса.
Иттифоқчиларга божлар жорий қилиш АҚШни жаҳон саҳнасида янада яккалаб қўйиш ва Хитойга халқаро бозорларда ўз мавқейини мустаҳкамлаш учун янги имкониятлар очиш хавфини туғдиради, дейилади WSJ материалида.
Изоҳ (0)