“Бу қандайдир бемаънилик”. Татаристон раҳбари рус тилини билмаган муҳожир болаларни мактабга қабул қилмаслик ҳақидаги қонунни танқид қилди

Татаристон раҳбари Рустам Миннихонов рус тилини билмаган хорижлик болаларни мактабларга қабул қилишни тақиқловчи қонунни танқид остига олди. У бу ҳақда 22 август куни Иннополисда ўтган таълим ва фан соҳаси ходимлари йиғилишида айтиб ўтди. 

“Ишлаш керак, тизимли ишлаш керак. Ахир болани мактабга киритмасангиз, у қаерда юриши керак? Тилни билмагани учун унинг нима айби бор? Ўрганади. Ҳар қандай бола уч-тўрт ойда тилни ўрганиб олади. Ҳеч қандай даҳшатли нарса йўқ. Умуман олганда, бу — бемаънилик. Болага эҳтиёткорлик билан муносабатда бўлиш керак, у айбдор эмас”, деди Татаристон раҳбари. 

Татар-информ нашрининг ёзишича, ҳозир Татаристон мактабларида уч мингдан ортиқ хорижлик болалар ўқийди. Бундан ташқари, яна 22 мингдан зиёд чет эллик талабалар олий таълим даргоҳларида таҳсил олмоқда.

“Муҳожирлар — бизнинг меҳнат ресурсимиз. Уларни қаердан оламиз? Уларнинг аксарияти қонуний, меҳнатга лаёқатли фуқаролар. Шу масалада тизимли ишлашимиз керак”, дея қўшимча қилди Миннихонов. 

У Татаристонда яшаётган муҳожирларнинг болалари рус тилини ўрганиши учун махсус курслар ташкил қилиш ҳақида кўрсатма берди.

 Рустам Миннихонов танқид қилган қонун Россияда 2025 йил 1 апрелдан кучга кирди. Унга биноан муҳожирларнинг болалари мактабга қабул қилинишдан олдин рус тилида тест топширишлари шарт.