Самвел Бабаян футболдан миллати учун четлатилдими ёки нафси?

Самвел Бабаянни сизга ортиқча таништириб ўтирмайман. Футболга қизиққан ўзбекистонлик борки, уни яхши танийди.

Бир неча кун олдин ЎФФ қарори билан Бабаян футболдан четлаштирилди. Бунга асос сифатида «Пахтакор» футболчилари билан боғлиқ иши кўрсатиб ўтилган. Тез орада Тошкент клубидан кетишини тушуниб етган футбол агенти, ўзига тегишли бўлган футболчиларнинг шартномасига ўзгартириш киритган ва уларга 2018 йилдан бошлаб эркин агентга айланиш имкониятини тортиқ қилган. Биргина Игорь Сергеев «Пахтакор»ни қай тариқа тарк этгани бунга исбот бўлсин.

ЎФФ Самвел Бабаянни футболга алоқадор ҳар қандай фаолият билан шуғулланишдан четлаштирди

Бабаян ЖЧ—2018 саралаш босқичининг 3-раундида кетма-кет ғалаба қозонишни бошлагач, унга таҳсин ўқийдиганлар кўпайиб қолди. Аммо бу кишини ёшлигимдан яхши билган инсон сифатида, унга бўлган позициямни ўзгартирмадим. Ишонардимки, Филиппин, Баҳрайн, Яман каби рақибларни ўзбекистонлик футболчилар бош мураббийсиз ҳам мағлуб эта оларди. Шунинг учун ҳам ҳал қилувчи босқич унинг савиясига ойдинлик киритиб беришини кутдим.

Ва биз кўрдик, Эрон ҳам, Жанубий Корея ҳам, Хитой ҳам Ўзбекистон устидан зафар қучди. Ўз сарҳадларида ўйнаш имкониятидан маҳрум Сурия ҳам Бабаян шогирдларидан устун келди. У қўли остидаги футболчиларни тарихдаги энг яхшиси деб атаган бўлса-да, ЖЧ саралашларининг сўнгги учта цикли бўйича энг ёмон натижа қайд этди. Боиси, бунгача Ўзбекистон терма жамоаси ҳеч бўлмаса плей-оффларга етиб бораётганди. Бабаян шакллантирган жамоа эса 4-ўриндан юқорига кўтарила олмади. Биз Австралия, Япония каби кучли рақиблар дуч келмаганида ҳам шу аҳволда қолдик.

Аммо унутмайлик, ЎФФнинг на янги ва на эски раҳбарияти айнан шуни байроқ қилиб, Бабаянни футболдан четлаштирмади. Чунки муваффақиятсизликлар спортда бор нарса. Бироқ шартномаларни ўз манфаати йўлида қонунга зид равишда бузадиган инсон ҳар қанақасига айбдор. Бабаян шунинг учун ҳам футболдан четлаштирилди.

Ёш футболчиларнинг оёғини қандай синдириш кераклигини бошқа бир ёш футболчига ўргатиши мумкин бўлган Бабаян ҳеч қачон кўз ўнгимдан кетмайди. Ўша-ўша унга на инсон ва на мутахассис сифатида юқори баҳо бера олмайман. Уни ўз манфаати йўлида ҳеч нарсадан тап тортмайдиган киши сифатида гавдалантираман. Ва ҳозир унинг сиймоси нақадар пасткашликка сабаб бўлиши мумкинлигини қолганларга кўрсатиш имкониятидан фойдаланмоқчиман. Бунинг учун сиз Арманистон сайтларидан бирида чиққан қуйидаги мақолани ўқиб чиқишингиз керак бўлади.

Тевос Аршакян мақоласи

Ўзбекистон юздан ортиқ миллат вакиллари тинч ва тотув ҳаёт кечирадиган мамлакат. Ростини айтсам, Бабаян ҳақида мақолалар ёзганимда ҳам ва ҳатто футболдан четлатилганида ҳам унинг арман миллатига мансуб экани хаёлимга келмаганди. Мен уни қанчалик ёмон кўрмайин, Ўзбекистоннинг бир бўлаги сифатида ичимга сингдириб юборгандим. Ва бугун кўрдимки, энг сўнгги чора сифатида биз қандай айбловлар билан тўқнашяпмиз.

Тўғри, бунда Бабаяннинг қўли бўлмаслиги мумкиндир. Аммо менга жуда қизиқ томони бор, ЎФФ яқиндагина Вадим Абрамовни ҳам футболдан четлатди. Нега у ҳақда бу каби мақолалар кўрмадик? Нега Арманистон журналисти айнан Бабаяндан кейин оёққа турди? Ўз вақтида Юрий Саркисян Фарғонанинг «Нефтчи» клубидан ҳайдалди. Бироқ биз ўша вақтда ҳам бу каби пасткашлик, миллатчилик гувоҳига айланмадик. Айтишим керакки, бу мақола кенг муҳокама бўлаётган бир вақтда, Бабаян бу борада бир оғиз чиқиш қилишни ҳозирча ўзига эп кўрмади.

Биз камида Абрамовни ҳам, Саркисянни ҳам, Бабаянни ҳам ўзимизнинг одамлар сифатида кўриб ўрганиб қолгандик. Ва миллатчи бўлмаганимиз учун ҳам футболдаги бу инсонларнинг ҳар бирига ўз вақтида мамлакатнинг бош жамоасини ишониб топширдик. Бизда Ареват Григорян деган журналист, Артур Григорян деган боксчи, Армен Багдасаровдек мураббий, Тамарахоним каби инсонлар қадр топди, ўша Фарғонадан кетган Саркисян каби мутахассисларнинг ўзбек футболи учун қилган меҳнатлари унутилмай, унинг каби кишилар «Бунёдкор»да қадр топди, фарғоналик юз минглаб мухлислар унга ҳурматини бажо келтирди. Ва ишонаманки, бундан кейин ҳам шундай бўлиб қолади.

Бабаян каби инсонлар фонида эса нафақат футбол лойқаланади, балки ўзбек-арман муносабатлари ҳам ҳаракатга келади. Мен буни истамасдим, қайси миллатга мансуб бўлишидан қатъий назар, Бабаянни ўзим учун шахс сифатида ўлдириб бўлганман. Унинг каби аҳволга тушмаган арман дўстларимизга эса чексиз ҳурматларим бўлсин.

ЎФФ раҳбарияти Бабаяннинг фақатгина битта ишини фош қилди. Ваҳоланки, футболдаги бир неча йилим давомида турли футболчи ва журналистлар томонидан унинг ҳозиргача исботланмаган қолган ишлари ҳақида кўп эшитганман. Қайсидир маънода ундан зарар кўрган ва буни оммага чиқаришдан қўрққан, тегишли органларга арз қилишдан чўчиган футболчи-ю мураббийлар бўлса, марҳамат, қинғир ишнинг қийиғи 40 йилдан кейин бўлса ҳам чиқишига умид бор. Ўтган ишга саловат айтмай, ҳақиқат қарор топиши учун курашиб кўринг.

Абдураҳмон Мешаян мақоласи