Россия НАТО чегарасидан 25 километр узоқликда улкан объект қурмоқда. Бу ҳақда Bild хабар берди.
Сунъий йўлдош тасвирлари Калининград вилоятида йирик радиоразведка станцияси қурилаётганини кўрсатмоқда. Қурилиш НАТО ва Польша чегарасидан атиги 25 километр нарида олиб борилмоқда.
Точний платформаси маълумотларига кўра, гап Черняховск шаҳри яқинида барпо этилаётган улкан ҳалқасимон антенна мажмуаси ҳақида кетмоқда. Ишлар 2023 йил март ойида бошланган бўлиб, шу вақт мобайнида ҳудуд тозаланган, девор билан ўралган, йўллар ётқизилган ва бинолар учун майдонлар тайёрланган.
“Ташқи ҳудудда антенна устунлари учун чуқурлар аниқ кўринади. Шунингдек, камида олтита ҳалқа шакли ажралиб турибди”, дея таъкидлайди таҳлилчилар.
Мутахассисларнинг қайд этишича, бу “ҳалқасимон антенна панжараси” деб аталади. У ҳарбий радиотехник разведка ва алоқа учун қўлланиладиган мураккаб антенналар тизими ҳисобланади. Объект диаметри 1600 метргача етиши мумкин, бу эса мавжуд шунга ўхшаш мажмуалардан бир неча баробар катта.
Прогнозларга кўра, қурилиш якунлангач, Россия НАТОнинг Шарқий Европа ва Болтиқбўйи давлатларидаги радиоалоқаларини ушлаб қолиш ҳамда Болтиқ денгизи ва Атлантика океанининг шимолий қисмидаги сув ости кемалари билан барқарорроқ алоқада бўлиш имконига эга бўлади.
Изоҳ (0)