АҚШ давлат қарзи тарихда биринчи марта 36 триллион доллардан ошди. Бу ҳақида АҚШнинг Debt Clock хизмати статистика маълумотларида маълум қилинди.
Хизматлар базасининг “жами давлат қарзи” устунида 15 ноябрь ҳолатига кўра 36 трлн АҚШ доллари кўрсатилган. Бу рекорд кўрсаткич ҳисобланади. Жорий йилнинг январь ойи бошида АҚШнинг давлат қарзи 34 триллион доллардан ошганди.
Аввалроқ республикачилар АҚШ президенти демократ Жо Байденни сиёсати учун танқид қилганди. Уларнинг фикрича, Байден сиёсати давлат қарзи ошишига олиб келган.
Июнь ойида Халқаро Валюта Жамғармаси (ХВЖ) ўз уставининг 4-моддаси асосида Америка иқтисодиётини қайта кўриб чиқиш бўйича ҳисоботида 2032 йилга бориб ЯИМнинг 140 фоизини ташкил этадиган Америка давлат қарзи масаласини ҳал қилиш зарурлигини таъкидлаганди.
Ташкилотнинг фикрича, “давлат қарзининг ялпи ички маҳсулотга нисбати доимий ўсишини тўхтатишга шошилинч эҳтиёж бор”, чунки жамғармага кўра, “бундай юқори тақчиллик ва қарзлар АҚШ ва жаҳон иқтисодиёти учун ортиб бораётган хавфни келтириб чиқаради”.
Молиявий муассаса ушбу муаммони зудлик билан бартараф этиш зарурлигини таъкидлади.
АҚШ Конгресси Бюджет бюросининг прогнозларига кўра, 2034 йилда давлат қарзи 50 триллион доллардан ошади (ялпи ички маҳсулотнинг 122 фоизи). Агентлик 2029 йилдан 2034 йилгача ялпи ички маҳсулотнинг ўртача йиллик ўсишини 1,8 фоизга баҳоламоқда.
Ўзбекистоннинг давлат қарзи қанча?
Жорий йил 1-ярмида Ўзбекистон давлат қарзи қолдиғи 37 миллиард долларни ташкил этди. Бу ҳақда 5 сентябрь куни ўтказилган парламент йиғилишида иқтисодиёт ва молия вазири Жамшид Қўчқоров маълум қилди.
Жамшид Қўчқоровнинг айтишича, 2024 йилнинг дастлабки ярмида давлат қарзи ялпи ички маҳсулотнинг 33,2 фоизига тенг бўлган.
Прогнозларга қараганда, мамлакат давлат қарзининг ялпи ички маҳсулотга нисбати 2024 йилда 37 фоиз, 2025 йилда 37,4 фоиз, 2026 йилда 37,9 фоиз атрофида бўлиши кутилмоқда.
Қонунчиликда давлат қарзи ялпи ички маҳсулотга нисбатан 60 фоизлик юқори чегараси белгиланган. Бунинг учун бюджет тақчиллигини 2024 йилда 4 фоиздан оширмаслик мақсад қилинган.
Изоҳ (0)