Ўзбекистон олтин-валюта захиралари 1 ноябрь ҳолатига кўра 43,14 миллиард долларни ташкил этди. Бу ҳақда Марказий банк маълумотларида келтирилган.
Октябрь ойида мамлакат захиралари 2 миллиард долларга ёки қарийб 5 фоизга ошди ва рекорд даражага етди. Захиралар кетма-кет тўрт ойдан бери ўсмоқда.
Захиралардаги олтин ҳажми сентябрдаги даражада қолди — 12 миллион троя унсияси (367 тонна). Олтин захиралари қиймати 1,44 миллиард долларга ошиб, 33,36 миллиард долларга етган.
Марказий банкнинг хорижий ҳисобварақларидаги нақд валюта ҳажми 445,5 миллион долларга ошиб, 9,11 миллиард долларга етди. Шундан 414,4 миллион доллари бошқа Марказий банклар ва Халқаро валюта жамғармалари, қолган 8,67 миллиард доллари эса бошқа хорижий молия институтларида сақланади.
“Олтин нархининг пасайишига таъсир кўрсатувчи омиллар жамланиб бораётгани ҳисобга олинса, 1 ноябрь ҳолатига захиралар қолдиғи яқин истиқбол учун тарихий максимум бўлиб қолиши мумкин”, деб ёзмоқда иқтисодчи Отабек Бакиров.
Изоҳ (0)