Бирлашган Миллатлар Ташкилотининг маълум қилишича, 2024 йилда ҳалок бўлган гуманитар ходимлар сони аввалги барча рақамлардан ошиб кетган. Жорий йил бутун дунё бўйлаб гуманитар ходимлар учун энг ҳалокатли йил бўлди.
Бу ҳақда БМТ манбаларига таяниб “Репорт” хабар бермоқда.
Бирлашган Миллатлар Ташкилотининг Гуманитар масалаларни мувофиқлаштириш бошқармаси (OCHA) маълумотларига кўра, 281 кишининг ўлимининг асосий сабаби Яқин Шарқдаги зиддиятнинг кучайиши билан боғлиқ. 2023-йилда ҳалок бўлган гуманитар ходимлар сони 280 нафарни ташкил қилганди.
“2024 йил дунёдаги энг қийин шароитларда ишлайдиган гуманитар ходимлар учун энг фожиали йил бўлди”, деди OCHA вакили Йенс Лерке Женевада бўлиб ўтган брифингда.
Бундан ташқари, Афғонистон, Конго Демократик Республикаси, Жанубий Судан, Судан, Украина, Яман ва бошқа мамлакатларда зўравонлик ҳамда таҳдидларнинг юқори даражаси қайд этилган.
OCHA маълумотларига кўра, жами ҳалок бўлганларнинг 268 нафари маҳаллий ва 13 нафари халқаро ташкилот ходимларидир. Йенс Лерке бу рақамлар “халқаро жамиятни қайғуга солаётганини” таъкидлаб, гуманитар ходимлар “инсоният учун фидойилик билан хизмат қилаётгани, аммо улар рекорд даражада ўлдирилаётганини” айтди.
2023 йил 7-октябрда Исроил ва ҲАМАС ўртасида можаро бошланганидан бери Яқин Шарқда 333 нафар гуманитар ходими ҳалок бўлди. Ғазо сектори соғлиқни сақлаш вазирлиги маълумотларига кўра, 13 ойлик жангларда 44 мингдан ортиқ одам ҳалок бўлган, улар орасида аёллар ва болалар катта қисмни ташкил этади.
БМТ ёрдам ходимлари учун хавфсизлик чораларини кучайтиришга чақириб, уларнинг дунё бўйлаб можаролардан жабрланганларга ёрдам беришдаги асосий ролини таъкидламоқда.
Изоҳ (0)