Украина 2025 йил учун давлат бюджетидан мудофаа ва хавфсизлик секторларига рекорд даражадаги 54,2 миллиард доллар (2,23 триллион гривна) ажратди. Шундан 17,96 миллиард доллари (739 миллиард гривна) қурол-яроғ ишлаб чиқариш, харид қилиш ва дронлар учун мўлжалланган. Бу ҳақда бош вазир Денис Шмигал маълум қилди.
Давлат бюджетининг энг катта қисми ҳарбий ҳаракатларни давом эттиришга ажратилади. Шу билан бирга, ижтимоий соҳалар ҳам устувор йўналишлар сифатида белгиланган. Жумладан:
- Ижтимоий дастурлар учун 10,24 миллиард доллар (421 миллиард гривна) ажратилиб, март ойида нафақалар индексацияси амалга оширилади.
- Таълим учун 4,84 миллиард доллар (199 миллиард гривна) ва соғлиқни сақлаш учун 5,27 миллиард доллар (217 миллиард гривна) ажратилган. Ушбу маблағлар таълим ва тиббиёт муассасаларини модернизация қилишга йўналтирилади.
- Хусусан, шифохоналарни янгилаш ва реабилитация марказлари ташкил этиш учун 260,1 миллион доллар (10,7 миллиард гривна), таълим муассасаларини модернизация қилиш ва бошпаналар қуриш учун эса 425,4 миллион доллар (17,5 миллиард гривна) йўналтириш кўзда тутилган.
Украина бош вазири маҳаллий бюджетларга ажратиладиган маблағ келгуси йили 15 фоизга оширилишини айтди.
Биз ҳудудларни қўллаб-қувватлашни давом эттирмоқдамиз. 2025 йилда маҳаллий бюджетларни молиялаштириш 15 фоизга ошади. Чекланган ресурслар шароитида бу бюджет устувор йўналишларни аниқ белгилаб беради. Мудофаа, хавфсизлик, халқимизни қўллаб-қувватлаш, мамлакатни ривожлантириш ва тиклаш шулар жумласидандир. Буларнинг барчаси бизни кучлироқ қиладиган ва ғалабага олиб борадиган нарсалардир, деди Денис Шмигал.
Давлат бюджети лойиҳаси Украина парламенти томонидан қабул қилинган. Эндиликда уни президент Владимир Зеленский имзолаши кутилмоқда.
Изоҳ (0)