АҚШ сайловларида ғолиб чиққан Дональд Трамп рақиби Камала Ҳарриснинг сайловолди кампанияси давомида юзага келган қарзини тўлашни таклиф қилди. Бу ҳақда у Truth Social тармоғида маълум қилди.
“2020 йилги президентлик сайловларида қатъий ва жасоратли кураш олиб борган демократлар рекорд миқдорда пул тўплаган бўлсалар ҳам, бир уюм доллар қолдирмаганларига жуда ҳайронман. Ҳам партия, ҳам зарурий бирлик мақсадида буни амалга оширишни қатъий тавсия қиламан. Бизда ҳали ҳам кўп пул бор”, деди у.
Трампнинг баёнотига Politico журналисти Кристофер Каделагонинг маълумоти сабаб бўлди. У манбаларга таянган ҳолда, Камала Ҳарриснинг сайловолди кампанияси камида 20 миллион доллар қарз билан якунланганини айтди. Ҳаррис жами 1 миллиард доллардан кўпроқ маблағ тўплаган, 16 октябрга келиб унинг ҳисобида 118 миллион доллар бор эди.
Трамп ва Ҳаррис сайловга неча пул сарфлади?
Сентябрь ойи охирида The Wall Street Journal иккала номзоднинг штаблари сайловолди кампаниясига сарфлаган харажатларини солиштирди. Ўша пайтда Ҳаррис ва Байденнинг харажатлари 743 миллион доллардан ортиқ, Трампники эса 426 миллион доллардан ортиқ эди. Иккала номзод учун ҳам реклама ва почта жўнатмалари харажатнинг асосини ташкил этган.
Дунёнинг энг бой одамларидан Илон Маск (Forbes маълумотларига кўра, бойлиги 304 миллиард доллар) Трампнинг сайловолди кампаниясига сезиларли ёрдам кўрсатди. Республикачи ғалабасидан сўнг Tesla акциялари кўтарилиб, Маскнинг бойлиги 26 миллиард долларга ошди.
The New York Times газетасига кўра, тадбиркор Трампни қўллаб-қувватлаган Америcа PAC суперқўмитасига тахминан 120 миллион доллар маблағ сарфлаган. Бу маблағнинг бир қисми “сўз эркинлиги ва қурол олиб юриш ҳуқуқи”ни қўллаб-қувватлаш учун петицияга имзо чеккан тасодифий сайловчиларга 1 миллион доллардан тўлаш учун ишлатилган.
Изоҳ (0)