Россия Қуролли кучлари юзлаб яманликларни Украинадаги урушда иштирок этиш учун ёллади. Бу ҳақда яманлик ёлланма аскарларга таяниб, Financial Times хабар берди.
Хабарга кўра, уларга Россияда юқори маош ва фуқаролик ваъда қилинган. Бу ишни ҳусийлар билан алоқадор компания таклиф этган. Яманликлар Россияга келганларида, уларни Мудофаа вазирлиги билан шартномалар имзолашга мажбурлашган ва урушга жўнатишган, деб таъкидлайди газета суҳбатдошлари.
FТ тахминига кўра, яман аскарларини ёллаш 2024 йилнинг июль ойидаёқ бошланган. Журналистлар шартномалардан бири билан танишиб чиққан. Унда 3 июль санаси қайд этилган ва у Нижний Новгороддаги урушга йўллаш маркази раҳбари томонидан имзоланган.
Ёлланганлардан бири — Набиль сентябрь ойида Москвага келгани ва фронтга жўнатилган тахминан 200 нафар яманликдан иборат гуруҳнинг аъзоси бўлганини айтди. У гуруҳидаги баъзилар тажрибали ҳарбийлар бўлса-да, кўпчилиги тайёргарликка эга бўлмаганини таъкидлади.
Набиль “хавфсизлик” ва “муҳандислик” соҳаларида фойдали иш ваъдаси билан Россияга алдаб олиб келинган. У Россияда пул ишлаб, ўқишини тугатишни режалаштирган.
FТ’нинг яна бир суҳбатдоши Абдулла эса унга дронлар ишлаб чиқаришдаги иши учун 10 минг долларлик бир марталик тўлов ва ойига икки минг доллар маош ваъда қилинганини эслади. 18 сентябрь куни Москвадаги аэропортга келганида, уни бошқа яманликлар билан бирга шаҳардан 5 соатлик масофада жойлашган объектга олиб кетишган.
Улар шартномани имзолашдан бош тортганларида, у ердаги эркаклардан бири уларнинг боши узра тўппончадан ўқ узган, дейди Абдулла.
Кейин уларни Украина билан чегарагача олиб боришган, оддий ҳарбий тайёргарликдан ўтказишган ва Ростов яқинидаги ҳарбий базага жўнатишган.
Абдулланинг таъкидлашича, у билан бирга бўлган гуруҳнинг кўпчилиги Украинада ҳалок бўлган. Уларни урушга “одамлар билан савдо қилувчи фирибгарлар” олиб келгани таъкидланган.
Россия ва Яман ҳамкорлиги
ОАВ Россия расмийлари Яман ҳусийлари билан ҳамкорлик қилаётгани ҳақида бир неча бор ёзган. CNN маълумотларига кўра, Россия июль ойи охирида Яман ҳусийларига ракета ва ҳарбий техника етказиб беришга ҳозирлик кўрган, бироқ Саудия Арабистони огоҳлантиришларидан сўнг охирги лаҳзада бу режаларидан воз кечган.
Reuters агентлигининг Ғарб ва минтақавий манбаларга таяниб хабар беришича, Россия Эрон воситачилигида ҳусийлар билан P-800 Oniks кемага қарши қанотли ракеталарини етказиб бериш бўйича яширин музокаралар олиб бормоқда.
Изоҳ (0)