Россиянинг Иркуцк шаҳрида қийин аҳволда қолган она ва унинг вояга етмаган фарзанди Ўзбекистонга соғ-саломат етиб олди. Бу ҳақда “Дунё” хабар берди.
Маълум қилинишича, Ўзбекистон Бош консулхонаси ва Миграция агентлиги ваколатхонаси ҳамкорлигида Россиянинг Иркуцк шаҳрида танг аҳволда қолган она ва унинг вояга етмаган фарзандининг ватанга етиб олишига амалий ёрдам кўрсатилди.
Аёлнинг сўрови асосида унга ва фарзандига Ўзбекистонда 30 июлдан 30 августгача эълон қилинган “Ватанга қайтариш” лойиҳаси доирасида Иркуцк-Тошкент йўналишидаги авиарейсга чипта олиб берилди.
Ватандошлар 15 август куни Uzbekistan Airways авиакомпанияси рейси билан Ўзбекистонга кузатиб қўйилди.
Ўзбекистонда жорий йил 30 июлдан 30 августгача “Ватанга қайтариш” хайрия гуманитар акцияси амалга оширилмоқда. Акция доирасида Саудия Арабистонида оилавий зўравонлик қурбони бўлган ўзбекистонлик ватанга қайтарилган эди.
“Ватанга қайтариш” хайрия акциясидан чет элларда оғир шароитда қолган ўзбекистонликларни ватанга қайтариш мақсад қилинган. Режага асосан, аввало Туркия, Россия, Қозоғистон, БАА, Саудия Арабистони, Ҳиндистон, АҚШ ва Кореядаги депортация марказларида бўлиб турган аёллар ва болалар ватанга қайтарилади.
Хорижда оғир молиявий аҳволда қолган фуқаролар консуллик муассасалари ёки Миграция агентлиги ваколатхоналари хулосаси асосида Ўзбекистонга олиб келинади. Ватанга қайтарилган фуқароларни самарали реинтеграция қилиш бўйича амалий чоралар кўрилади. Улар давлат томонидан тақдим этилаётган мақсадли субсидиялар, имтиёзли кредитлар, тадбиркорлик ва ўзини ўзи банд қилиш дастурлари орқали қўллаб-қувватланади.
Фуқароларни қайтариш билан боғлиқ транспорт харажатлари Миграция жамғармаси маблағлари ҳисобидан қопланади.
Маълум қилинишича, элчихона ва консулликлар 7 августгача чет давлатлар депортация марказларидаги ўзбекистонлик фуқароларни аниқлайди. Кейин рўйхатни Миграция агентлигига тақдим этади.
15 августгача шахсий маълумотлари етарли бўлмаганлар учун зарур ҳужжатларни тайёрлаб, иккинчи рўйхатни агентликка юборади.
Миграция агентлиги тақдим этилган рўйхат асосида 1–3 иш куни ичида авиачипталарни харид қилади.
Фуқаро миграция агентлигига тўғридан тўғри мурожаат қилса, агентлик ходимлари 1–2 соат ичида у билан боғланади. Ҳужжатларни масофавий қабул қилади. Аризани бир кун ичида кўриб чиқиб, икки кун муддатда йўл чипта билан таъминлайди.
Маҳаллий ҳокимликлар, Бандлик вазирлиги, Оила ва хотин-қизлар қўмиталари, ватанга қайтарилган фуқароларни руҳий, ижтимоий ва иқтисодий мослаштириш ишларини амалга оширади.
Изоҳ (0)