Халқаро Футбол Ассоциациялари Федерацияси (FIFA) клублар ўртасидаги Жаҳон чемпионати форматини ўзгартириш масаласини кўриб чиқмоқда. Бу ҳақда The Guardian нашри хабар берди.
Манбага кўра, FIFA лойиҳасида мусобақани ҳозиргидек тўрт йилда бир эмас, балки 2029 йилдан бошлаб икки йилда бир марта ўтказиш ва иштирокчилар сонини 32 тадан 48 тага ошириш назарда тутилган. Шунингдек, турнир даражасининг пасайишига йўл қўймаслик мақсадида, бир мамлакатдан 2 тадан кўп клуб қаташа олиш имкониятини ҳам кўриб чиқмоқда.
Маълум бўлишича, “Реал Мадрид” июнь ойида ўтган FIFA билан музокаралар чоғида мусобақани икки йилда бир марта ўтказишни таклиф қилган. Мазкур таклиф бу йилги турнирда иштирок эта олмаган бошқа клублар, жумладан “Барселона”, “Манчестер Юнайтед”, “Ливерпуль” ва “Наполи” томонидан қўллаб-қувватланган.
Хабарда айтилишича, халқаро футбол тақвими ҳаддан ташқари банд бўлгани сабабли, турнир давомийлигини ошириш лозим бўлади. Бунинг эвазига ўртоқлик учрашувлари ва июнь ойидаги айрим миллий терма жамоалар турнирлари бекор қилиниши мумкин. Бу эса ўз навбатида УЕФА Миллатлар лигаси тақвимига ҳам ўзгартириш киритишни талаб қилади.
Эслатиб ўтамиз, 2025 йил ёзида АҚШ мезбонлик қилган янги форматдаги Клублар ўртасидаги Жаҳон чемпионатида Англиянинг “Челси” клуби ғалаба қозонган. Лондонликлар ҳал қилувчи ўйинда Франциянинг “ПСЖ” жамоасини 3:0 ҳисобида мағлуб этиб, чемпионликни қўлга киритишган эди.
Изоҳ (0)