АҚШ президенти Жо Байден Россия етакчиси Владимир Путинни диктатор деб атади ҳамда кейинги сайловлардаги эҳтимолий рақиби Дональд Трампнинг сиёсий қарашларига изоҳ берди. Бу ҳақда Reuters ёзмоқда.
“Мен Путин каби диктаторлар тарафида бўлмайман. Балки Трамп ва унинг МАGА даги (Маkе Аmеricа Great Аgain) дўстлари унга қуллуқ қилишар, лекин мен бундай қилмайман”, — деди Байден ўз тарафдорлари билан учрашувда.
АҚШ президентининг айтишича, Трамп Америка демократиясини йўқ қилишга киришаётган пайтда, айримлар Байденнинг ёшига ҳаддан ортиқ эътибор беришмоқда.
Трамп агар президент этиб қайта сайланса, 24 соат ичида Украинадаги кенг кўламли жангларни тўхтатишга бир неча бор ваъда берганди. Путин эса сайловларда Трампнинг ғалаба қозониши АҚШ билан муносабатларни ўзгартирмаслигини айтди.
Эслатиб ўтамиз, Россиянинг Украинага босқини бошланганидан кўп ўтмай, 2022 йил 17 март куни Жо Байден Владимир Путинни “қонли диктатор ва Украина халқига қарши ахлоқсиз уруш олиб бораётган ҳақиқий каллакесар” деб атаган. Ундан аввал, 16 март куни эса Байден Россия президентини ҳарбий жиноятчи деб атаганди. Россия президентининг матбуот котиби Дмитрий Песков АҚШ давлат раҳбарининг “Путинни ҳарбий жиноятчи” деб атаган баёноти “ўринсиз ва кечириб бўлмайдиган нутқдан” бошқа нарса эмаслигини айтган.
Изоҳ (0)