Россия президенти матбуот котиби Дмитрий Песков Украинадаги “махусус операция”нинг янги мақсадини айтди. Бу ҳақда “Ведомости” хабар берди.
Песковнинг таъкидлашича, уруш Россия ҳудуди ўққа тутилмаслиги учун давом этади. У Белгород вилоятининг Украина ҳарбийлари томонидан гўёки ўққа тутилгани ҳақидаги хабарга шундай изоҳ берган.
“Умуман олганда, табиийки, биз бу ҳужумни имкон қадар қаттиқ қоралаймиз. Бу содир бўлмаслиги учун махсус ҳарбий операция давом этади”, — деган у.
Россия оммавий ахборот воситаларида 16 май куни эрталаб Украина қуролли кучлари Белгород вилоятини “фосфорли бомбалар” ёрдамида “яна ўққа тутгани” ҳақида маълумотлар пайдо бўла бошлади.
Дастлабки маълумотларга кўра, отишма Град ўт очувчи реактив тизим томонидан амалга оширилган. Жами саккизта ҳужум қайд этилган бўлиб, ҳодиса оқибатида ҳеч ким жабрланмаган.
Россиянинг Украинага қарши босқини
2022 йил 24 февраль куни Россия “демилитаризация” ва “денасификация”ни амалга ошириш мақсадида Украинага кенг кўламли босқинни амалга оширди. Шуниси эътиборга лойиқки, Россия ҳукумати ҳатто урушни уруш деб атамай, унга “махсус ҳарбий операция” мақомини берган.
Россия армияси бир қатор жиддий мағлубиятга учрагач, Кремль “махсус операция”га нисбатан уруш таърифини берди.
“Бугунги кунда қилаётган ҳар бир ишимиз, шу жумладан, ‘махсус ҳарбий операция’ урушни тўхтатиш ва Донецк ҳамда Луганск ҳудудларида яшовчи халқимизни ҳимоя қилишга уринишдир. Бу бизнинг тарихий ҳудудларимиздир”, — деган эди Путин.
Изоҳ (0)