Украина президенти Владимир Зеленский 2021—2022 йиллар учун даромадлари тўғрисидаги декларацияларини эълон қилди. Бу ҳақда Украина раҳбари матбуот хизмати хабар берди.
2021 йилда президент ва унинг оиласи 10,824 миллион гривна (2021 йил якунидаги курс бўйича деярли 398 минг доллар) даромад олган, шундан 5 миллиондан ортиғи ички давлат облигацияларини сотишдан тушган даромаддир. Қолганлари — иш ҳақи, банк фоизлари ва кўчмас мулкни ижарага беришдан олинган даромадлар. 2020 йил билан солиштирганда даромад 11,922 миллион гривнага камайди, дея таъкидлайди Зеленский матбуот хизмати. Ўшанда президентнинг оиласи 22,7 миллион гривна ёки 2021 йил март ойидаги курс бўйича 815 минг доллар ишлаб топганди.
2022 йилги декларацияга кўра, ўша йили Зеленский ва унинг оиласи даромади 2021 йилга нисбатан уч баравар камайган – 3,692 миллион гривна (98 минг доллар). Президент офиси даромаднинг камайишини Россия босқини туфайли “Украинадаги ижара шартномаларининг вақтинчалик бекор қилингани” билан изоҳламоқда.
2022 йил сентябрида La Stampa газетаси Италиянинг Forte-dei Marmi коммунасида Зеленскийлар оиласига тегишли виллани ижарага олишни ташкил қилувчи агентликка Россиядан келган мижозлар билан музокаралар олиб бориш тақиқлангани ҳақида ёзганди.
Зеленский бир қатор савдо белгиларининг эгаси бўлиб қолмоқда, — деди президент офиси.
Украинада депутатлар ва амалдорлар учун мажбурий даромад декларацияси уруш бошланганидан кейин вақтинча тўхтатилганди. 2023 йил сентябрь ойининг бошида Олий Рада мажбурий электрон декларацияларни тиклаш тўғрисидаги қонунни қабул қилди, бироқ декларациялар реестрини яна бир йилга жамоатчиликка ёпиб қўйди. Unian хабарига кўра, Зеленский ёпиқ реестр қабул қилиниши мумкин эмаслигини таъкидлаб, қонунга вето қўйган. Рада президент киритган тузатишларни қабул қилди ва уни жамоатчилик учун очди.
Изоҳ (0)