Apple улуши қисқарди: Уоррен Баффет янги компанияларга 1,5 млрд доллар инвестиция киритди

Америкалик инвестор ва миллиардер Уоррен Баффет раҳбарлик қиладиган Berkshire Hathaway компанияси 2025 йилнинг иккинчи чораги учун молиявий ҳисобот эълон қилди. Унга кўра, компаниянинг Apple’даги улушлари 6,7 фоизга камайгани маълум бўлди. Бу ҳақда “РБК” хабар берди.

Ҳисоботда маълум қилинишича, Баффет Apple ва Bank of America’даги улушларини қисқартирган, бироқ қурилиш, энергетика ҳамда алкоголь саноатидаги инвестицияларни оширган. Шунингдек, у суғурта гиганти UnitedHealth Group акцияларини харид қилиб, ўзининг сармоя портфелига янги компанияларни қўшган. Ҳисоботга кўра:

• Berkshire Hathaway’нинг умумий активлари қиймати йилнинг иккинчи чорагида 257,5 миллиард доллар бўлиб, аввалги чоракка нисбатан бир оз камайиш қайд этилган;
• молиявий сектор портфелнинг 41,3 фоизини ташкил этиб, энг катта улушга эга. Кейинги ўринларда ахборот технологиялари (23,8 фоиз), истеъмол товарлари (16,5 фоиз), энергетика (11,1 фоиз) ва соғлиқни сақлаш (2,5 фоиз) турибди;
• Apple улуши 22,3 фоизгача камайган бўлса-да, у барибир сармоянинг энг йирик қисми ҳисобланмоқда. Иккинчи ва учинчи ўринларда American Эхпресс (18,8 фоиз) ҳамда Bank of America (11,1 фоиз) қайд этилган. Coca-Cola эса тўртинчи ўринга тушган.

Қуйида Berkshire Hathaway компанияси томонидан амалга оширилган янги харидлар келтирилган:

1. UnitedHealth Group — 1,57 миллиард доллар.
2. Lamar Advertising — 142 миллион доллар.
3. Allegion (хавфсизлик технологиялари) — 112 миллион доллар.

Улуши оширилган компаниялар эса қуйидагилар:

• Lennar Corp (қурилиш) — 256 фоиз ўсиш (780 миллион доллар);
• Pool Corp (бассейн ускуналари) — 136 фоиз ўсиш (1 миллиард доллар);
• Chevron — 17,5 миллиард доллар;
• Constellation Brands (алкоголь) — 2,2 миллиард доллар.

Улуши камайтирилган компаниялар:

• Apple — 6,7 фоиз (57,4 миллиард доллар)
• Bank of America — 28,6 миллиард доллар

Маълумот ўрнида, Уоррен Баффет ҳозирда 94 ёшда. У йил охиригача Berkshire Hathaway бош директори лавозимини тарк этиши кутилмоқда. Унинг ўрнини Грег Эбел эгаллаши режалаштирилган. Баффет эса компания кузатув кенгаши раиси сифатида қолади.