АҚШнинг Калифорния штатида шаршара ортидаги ғорда икки кун қолиб кетган 46 ёшли эркак полиция томонидан вертолёт ёрдамида қутқариб олинди. Бу ҳақда The Guardian хабар берди.
Туларе округи шерифининг маълум қилишича, Райан Уордвел 10 август куни “Seven Теаcups” номи билан машҳур шаршараларга келиб, арқон ёрдамида пастга тушишни режалаштирган. Аммо кучли сув оқими унинг арқонини узиб юбориб, эркак Керен дарёси шаршара ортидаги ғорга тушиб қолган.
Уордвелнинг машинасига қайтмаганини кўрган маҳаллий ҳуқуқ-тартибот идоралари 11 август куни инфрақизил технологиялар (иссиқликни аниқловчи қурилмалар) ва вертолёт ёрдамида қидирув ишларини бошлаган. Бироқ мураккаб релеф ва қоронғилик туфайли қидирув муваффақиятсиз якунланган. Орадан бир кун ўтиб, дрон шаршара ортида ҳаёт учун курашаётган эркакни тирик ва ҳушёр ҳолда топган.
Йўл патрул вертолёти экипажи уни хавфсизликка олиб чиққан ва Уордвелга енгил жароҳатлар ва сувсизланишга қарши тиббий ёрдам кўрсатилган. Сўнгра у яқинлари билан учраштирилган. Шерифлик идораси эркакни мўжиза туфайли омон қолганини таъкидламоқда. Хусусан, Туларе округи шерифлик бошқармаси капитани Кевин Кеммерлингнинг айтишича, Уордвел икки кун давомида ғордан чиқишга уринган, аммо бунинг имкони бўлмаган.
“Ғорда Уордвелнинг исинишига ҳам, қуришига ҳам имкон йўқ эди, шароит жуда оғир бўлган”.
Уордвелнинг айтишича, у ушбу шаршарага олдин ҳам бир неча бор келган ва пастга тушишга уринган. Аммо бу сафар унинг ҳамроҳлари сув оқимининг кучини кўриб, давом этмасликка қарор қилган. У эса йўлида давом этган ва бахтсиз ҳодиса туфайли шаршара ортидаги қоронғи ғор ичида икки кун нам ва совуқ шароитда қолиб кетган.
Изоҳ (0)