Германия бўйлаб йигирмадан ортиқ мактаблар бомба жойлаштирилгани ҳақида аноним хабарлар олишди.
Бу ҳақда Билд нашри хабар бермоқда.
Унинг маълумотларига кўра, Бранденбург федерал штатида камида 12 мактаб, Ганновердаги тўртта мактаб ва Эрфуртда яна бешта таълим муассасаси таҳдид остида қолган. Лейпциг ва Штурдаги баъзи мактаблар ҳам худди шундай хабарларни олди.
Штур шаҳрида полиция маҳаллий мактаблардан бирида тинтув ўтказгани сабабли мактабга кириш қатъиян тақиқланди.
Таҳдид хатларини юбориш бўйича бу кампания бутун мамлакат бўйлаб амалга оширилмоқда, деди Қуйи Саксония штати полиция департаменти вакили.
Ҳуқуқ-тартибот идоралари вакилларига кўра, хабарлар якшанба куни электрон почта орқали олинган. Эрфурт полицияси почта қутиларида баъзи хатлар топилганини айтди. Федерал штатларнинг ҳуқуқ-тартибот идоралари мазкур ҳолат бўйича биргаликда тергов олиб бориш ва жиноятчиларни аниқлашга киришган.
Полиция ходимлари Германиянинг турли штатларидаги мактабларда тинтув ўтказгандан сўнг, бомба борлигини ёки портлаш хавфи мавжудлигини аниқламади. Аноним тарзда юборилган хабарлардаги маълумотлар ёлғон бўлиб чиқди.
5 ноябрь куни АҚШда сайлов участкаси ходими муддатидан олдин овоз бериш жойини портлатиб юбориш билан таҳдид қилгани учун ҳибсга олинганди.
Хабар қилинишича, 25 ёшли Николас Уимбиш октябрь ойи ўрталарида сайловчилардан бири билан жанжаллашиб қолган. Орадан кўп ўтмай, у бу одам номидан сайлов участкаси директорига таҳдид қилинган хат юборган. Мактубда, шунингдек, эрта овоз бериш жойида портлаш юз бериши мумкинлиги ҳақида огоҳлантирувчи эслатма ҳам бор эди.
“Уимбиш бомба таҳдиди юбориш, бомба таҳдиди ҳақида ёлғон маълумот тарқатиш, таҳдидли хат юбориш ва ФҚБга ёлғон баёнотлар беришда айбланмоқда. У энг кўпи 25 йиллик қамоқ жазосига ҳукм қилиниши мумкин”, дейилган баёнотда.
Изоҳ (0)