Германия Ташқи ишлар вазирлиги фуқароларини Эронни зудлик билан тарк этишга чақирди, Германиянинг Теҳрондаги элчихонаси эса эҳтиёт чораларини кўргани маълум қилинди.
Германиянинг Lufthansa авиакомпанияси “мавжуд вазият туфайли” Теҳронга барча рейсларни бекор қилган. Ушбу қарор камида 18 апрелгача амал қилади. Бундан ташқари, Lufthansa Эрон ҳаво ҳудудидан фойдаланишдан воз кечган.
“Биз ҳамкорларимиз билан биргаликда Яқин ва Ўрта Шарқдаги вазият кескинлашувининг олдини олиш учун дипломатик даражада барча имкониятларни ишга соляпмиз. Минтақада яшовчи Германия фуқаролари, илтимос, хавфсизлик бўйича кўрсатмаларимизга эътибор беринг”, — дейилади Германия ТИВ хабарида.
Вазирлик фуқароларини Эрон, Исроил ва Ғазога бормасликка чақирган. Бундан ташқари, Эрон ҳудудини зудлик билан тарк этиш тавсия этилади. Айни пайтда Қатар, Бирлашган Араб Амирликлар, Баҳрайн ва Саудия Арабистони ўз фуқароларини зудлик билан Исроил ҳудудини тарк этишга чақирган.
Аввалроқ АҚШ президенти Жо Байден Эрон ҳукуматини Исроилга қарши жавоб зарбаларидан огоҳлантирганди. Шу билан бирга, у ҳужум муқаррар эканини айтган.
“Исроилни ҳимоя қилишга содиқмиз. Уни қўллаб-қувватлаймиз ва ҳимоя қилишга ёрдам берамиз. Эрон эса муваффақиятга эриша олмайди”, — деган у.
Ўз навбатида, Эрон агар америкаликлар Исроил билан эҳтимолий қуролли можарога аралашса, АҚШ ҳарбийлари нишонга айланишидан огоҳлантирди. Тегишли огоҳлантириш бир қанча араб давлатлари орқали Жо Байден администрациясига етказилган. Огоҳлантиришда гап АҚШ ҳарбийлари Эрондан Исроилга учирилган ракеталарни уриб тушириши ёки Исроил томонида америкаликлар қарши ҳужумда қатнашиши ҳақида кетяптими, аниқ эмас.
Эрон ва Исроил ўртасидаги уруш эҳтимоли
Кенг кўламли уруш бошланиши эҳтимоли Исроил 1 апрель куни Эроннинг Дамашқдаги консуллигига ҳужум қилганидан сўнг бошланди. Ҳужум оқибатида 11 киши, жумладан, 2016 йилгача Ливан ва Суриядаги “Қудс” элита кучларига раҳбарлик қилган Эрон ҳарбий маслаҳатчиси генерал Муҳаммад Ризо Зоҳидий, унинг ўринбосари генерал Муҳаммад Ҳоди Ҳожи Раҳимий ва яна беш эронлик зобит ҳам ҳалок бўлди. Шунингдек, уч нафар Сурия ва бир нафар Ливан фуқароси вафот этди.
Эроннинг БМТ миссияси зарбани теракт деб баҳолади. Эрон ташқи ишлар вазири Ҳусайн Амир Абдуллоҳиян мазкур ҳужум муносабати билан Америка жавобгарликка тортилиши кераклигини айтди. Шундан кейин АҚШ разведкаси Исроилни Эроннинг жавоб зарбаларидан огоҳлантирди. Бунинг фонида Исроил бир қатор давлатлардаги элчихоналарини вақтинчалик ёпди ва ходимлардан ишга келмаслик сўралди.
АҚШ Марказий разведка бошқармаси Исроил расмийларини “яқинда содир бўладиган оммавий ҳужум” ҳақида огоҳлантирган. Америка расмийларининг таъкидлашича, Эрон камида учта ядровий бомба ишлаб чиқариш учун етарли даражада бойитилган уранга эга. Бу ҳақда расмий маълумот йўқ, аммо Эроннинг баллистик ракеталари Исроилга зарба бера олади.
Изоҳ (0)