Европа иттифоқи 2024 йил баҳоригача Украинани бир миллион артиллерия снаряди билан таъминлашга ваъда берганди. Европа дипломатияси раҳбари Жозеп Боррел мазкур ваъда бажарилганини айтди.
Биз Украинага 1 миллион снаряд етказиб бериш бўйича ўз ваъдамизни бажардик ва қиш охиригача 75 минг украиналик аскарни тайёргарликдан ўтказамиз, деган у.
Боррел Европа иттифоқи ва унга аъзо давлатлар Украинанинг энг кучли тарафдорлари бўлиб қолиши ҳамда иттифоқнинг Киевга ёрдами ортишини айтди. Бироқ у ҳозирги қўллаб-қувватлаш даражаси жанг майдонидаги вазиятни Украина фойдасига ўзгартириш учун етарли эмаслигини ҳам тан олди.
Биз ёрдамни кучайтиришимиз ва Украина ҳимоячиларига қизил чизиқлар қўйиш сиёсатидан воз кечишимиз керак, деди Боррел.
Европа дипломатияси раҳбарига кўра, иттифоқ кенг кўламли уруш бошидан бери Украинага 45 миллиард евролик ҳарбий ёрдам кўрсатган.
Украина учун бир миллион снаряд
2023 йилнинг март ойида Европа давлатлари Эстония ташаббуси билан Украинага бир миллион артиллерия снарядлари етказиб беришга келишиб олганди. Бироқ иттифоқ аъзолари ишлаб чиқариш қувватини тўғри баҳолай олмагани, логистика занжиридаги муаммолар сабаб белгиланган мақсадга эришиб бўлмади.
Масала мавжуд захираларни етказиб бериш ҳақида эмас, балки ишлаб чиқариш қувватида эди. Биз баҳорга қадар бир миллион снаряд даражасига эришишга ваъда берганимизда, ҳақиқий имкониятларимизни билмасдик. Энди бу қувватга эришдик, деган Боррел.
Изоҳ (0)