Европа иттифоқи расмийлари Хитойни Россияга ҳарбий ёрдам кўрсатаётганликда гумон қилмоқда. ЕИга кўра, Хитой Россия армиясига дронлар етказиб бераётган бўлиши мумкин.
Германия ташқи ишлар вазири Анналена Бербок 18 ноябрь куни Брюсселда бўлиб ўтган ЕИ йиғилиши чоғида ҳукумат Хитой Россияга бундай ёрдам бераётганини тахмин қилишини тасдиқлаб, “бу тегишли оқибатларга олиб келишини” таъкидлади.
Аввалроқ Европа иттифоқининг ташқи ҳаракатлар хизмати ҳозирда Хитойда Россиянинг Украинага қарши ҳужуми учун дронлар ишлаб чиқарилаётгани ҳақидаги далилларни текшираётганини айтган эди.
“Биз разведка манбаларидан Хитойда Россияга етказиб бериладиган ва Украинага қарши урушда фойдаланиладиган дронларни ишлаб чиқарадиган завод борлиги ҳақида хабар олдик”, деган эди ЕИ вакили.
ЕИ дипломатияси раҳбари Жосеп Боррель Хитойнинг Россияга қурол-яроғ етказиб бераётгани ҳақидаги маълумотни олиши билан Пекинга қарши санкциялар жорий қилиш ниятини билдирган. У, шунингдек, мазкур ҳаракатлари учун Хитойни жазолашни талаб қилган.
Қайд этилишича, ҳозирда Хитой ва Россия ўртасида ҳарбий техника соҳасида тўғридан тўғри ҳамкорликни йўлга қўйиш бўйича ишлар олиб борилмоқда. Агар бу маълумот тасдиқланса, Хитойга нисбатан санкциялар қўлланилиши мумкин. Хитой ҳозирча бу айбловларни рад этмоқда.
ЕИ дипломатларининг фикрича, Хитойда дронларни ишлаб чиқариш Россия, Хитой ва Эроннинг қўшма лойиҳасидир.
Европа иттифоқи аллақачон Эронга Россияга учувчисиз самолётлар ва баллистик ракеталар етказиб бергани учун санкциялар киритган ва ҳозирда Эронга қарши янги санкциялар пакетини тасдиқлашга тайёрланмоқда.
Изоҳ (0)