“Украинадаги уруш натижаси баҳор-ёзда ҳал бўлади” — Боррель

Европа Иттифоқининг ташқи ишлар бўйича олий вакили Жосеп Боррель Украинадаги урушнинг натижаси шу йилнинг баҳор ва ёзида ҳал бўлишини айтди. Бу ҳақда BBC хабар берди.

Боррель шу сабабли Украина АҚШнинг янги ҳарбий ёрдам ажратишини узоқ кута олмаслигини айтди.

“Нима бўлишидан қатъи назар, тезда бажарилиши керак. Кейинги ойлар ҳал қилувчи бўлади. Кўпчилик таҳлилчилар Россиянинг жорий ёзда йирик ҳужумини кутмоқда ва Украина АҚШдаги навбатдаги сайлов натижаларини кута олмайди”, — деди у.

Евроиттифоқ дипломатияси раҳбари Европа ҳам Украинага ҳарбий ёрдамни тезлаштириши кераклигини айтди.

“Қўллаб-қувватлашимизни кучайтиришимиз керак. Шунинг учун саноат мудофаа салоҳиятимизни оширмоқдамиз”, — дея қўшимча қилди Жосеп Боррель.

АҚШ Украинага 300 миллион долларлик янги ҳарбий ёрдам пакетини юборишини маълум қилди.

“Ушбу пакет ёрдамнинг 55-транши бўлиб, 300 миллион долларгача баҳоланмоқда. У Украинанинг ҳаво мудофааси, артиллерия ва танкка қарши қуролларга бўлган эҳтиёжларини ўз ичига олади”, — дейилади Пентагон сайтида.

Пакетга Stinger MANPADS, HIMARS ракета тизимлари учун ўқ-дорилар, 155 мм артиллерия снарядлари, шу жумладан, юқори портловчи, икки томонлама такомиллаштирилган кассетали ўқ-дорилар (DPICМ), 105 мм снарядлар ва АТ4 танкка қарши граната отиш мосламалари киради.

Украинада уруш бошлангандан бери АҚШ, Мудофаа вазирлигининг ҳисоботида кўрсатилганидек, Киевга 44,2 миллиард доллар юборди. Икки йил ичида Украинага Патриот ҳаво мудофаа тизими, 2 мингдан ортиқ Stinger MANPADS, 12 NASAMS, 31 Abrams танклари ва 45 Т-72Б танклари, 20 Ми-17 вертолётлари ва бошқалар берилди.

2023 йил октябрь ойидан бери Конгресс Украинага молиявий ёрдам кўрсатиш лойиҳасини муҳокама қилмоқда. Дастлаб Украина (60,06 миллиард доллар), Исроил (14,1 миллиард доллар) ва Тайванни (4,83 миллиард доллар) қўллаб-қувватлаш учун 118 миллиард доллар ажратиш, шунингдек, АҚШ чегараларини мустаҳкамлаш чоралари (20,23 миллиард доллар) кўзда тутилган.

Февраль ўрталарида Сенат Украина, Исроил ва Тайванга 95 миллиард долларлик ёрдам ажратадиган ҳужжатни маъқуллади. Вакиллар палатаси ҳали бу ташаббусни кўриб чиқмаган.