Амстердамда исроиллик “Маккаби” клуби мухлисларига қилинган ҳужумдан қарийб бир ҳафта ўтиб, Нидерландия полицияси пойтахтда оммавий йиғилишлар ўтказиш тақиқига қарши чиққан 300 га яқин Фаластин тарафдори бўлган намойишчиларни ҳибсга олди.
“Полиция Дам майдонидаги намойишда 281 кишини ҳибсга олди”, дейилади полиция ҳисоботида.
Полиция йиғилганларни ҳудудни тарк этишга чақирган, бироқ кўпчилик бунга риоя қилмаган. Шунингдек, намойишчиларнинг бир қисми автобусда марказдан узоқроқдаги жойларга, баъзилари эса полиция бўлимларига олиб кетилгани айтилган.
Акция иштирокчилари “Амстердам геноцидга йўқ дейди” ва “Фаластинга озодлик” каби шиорлар билан намойишга чиққан. Улардан аксарияти ҳибсга олиш пайтида қаттиқ қаршилик кўрсатган.
Бу Амстердамда 7 ноябрь куни исроиллик футбол мухлисларига қилинган ҳужумдан кейин Фаластин тарафдорларининг учинчи митингидир. Норози оломоннинг асосий қисмини ўсмирлар ва ёшлар ташкил этган.
Исроиллик футбол мухлисларига ҳужум
Жорий йил 7 ноябрь куни Амстердамда ниқобли шахслар Европа лигаси доирасидаги маҳаллий “Аякс” ва “Маккаби” ўртасидаги ўйиндан сўнг исроиллик мухлисларга ҳужум қилган эди. Уларнинг аксарияти Фаластин байроқларини ушлаб, Фаластин тарафдори ва антисемитизм шиорларини айтган. Ҳужумчилар исроилликлар жойлашган меҳмонхоналарга ҳам бостириб киришга ҳаракат қилган.
10 ноябрь куни Амстердамда намойишлар вақтинчалик тақиқланганига қарамай яна бир бор Фаластин тарафдорлари митинги бўлиб ўтди, полиция ўнлаб одамларни ҳибсга олган. 11 ноябрь оқшомида шаҳарнинг ғарбий қисмида бир неча ўнлаб Фаластин тарафдорлари бўлган йигитлар антисемитизм шиорларини айтиб, трамвайга ҳужум қилган.
Европа лигаси доирасидаги “Маккаби” — “Бешиктош” учрашуви Венгрияга кўчирилди
Европа футбол уюшмалари иттифоқи Европа лигаси доирасида 28 ноябрь куни Туркияда бўлиб ўтиши керак бўлган “Маккаби Тель Авив” – “Бешиктош Истанбул” ўйини Венгриянинг Дебрецен шаҳридаги нейтрал майдонга кўчирилганини эълон қилди.
Изоҳ (0)