Россия ва Украина ўртасидаги уруш камида беш йил давом этиши мумкин. Бу ҳақда Россия президенти Владимир Путин шу йилнинг март ойида Москвада бўлиб ўтган музокаралар чоғида Хитой раҳбари Си Цзиньпинга айтган, деб хабар бермоқда Nikkei Asia.
Нашрнинг қайд этишича, Путиннинг уруш 5 йил давом этиши ҳақидаги сўзларидан сўнг Хитой ўз стратегиясини қайта кўриб чиқди. Узоқ давом этадиган уруш Си Цзиньпиннинг Хитой етакчиси сифатида учинчи муддатдаги амбицияларига сезиларли таъсир кўрсатиши мумкин. Гап, хусусан, Тайваннинг аннексия қилиниши ҳақида кетмоқда, дейилади Nikkei Asia эълон қилган материалда.
Россия Федерацияси ва Украина ўртасидаги уруш 2022 йил февраль ойида бошланган. Жорий йилнинг июнь ойи бошидан Украина қуролли кучлари қарши ҳужумга ўтди. Украина томони ҳарбий ҳаракатлар Украина ҳудудий яхлитлиги тикланмагунча тўхтамаслигини маълум қилган.
Аввалроқ Россия президенти Владимир Путиннинг матбуот котиби Дмитрий Песков Европа Иттифоқи томонидан Украинага янги ёрдам пакети ажратилиши Россиянинг “махсус ҳарбий операцияси”га таъсир кўрсата олмаслигини айтиб ўтганди.
Изоҳ (0)