9 апрель куни Грузиянинг “Ягона миллий ҳаракат” (ЯМҲ) мухолифат партияси тарафдорлари ушбу сиёсий куч асосчиси, ҳибсда сақланаётган Михаил Саакашвилини қўллаб-қувватлаш мақсадида Тбилиси марказида митинг ўтказди. Euronews телеканали митинг иштирокчилари сонини бир неча минг киши деб баҳоламоқда. Грузия собиқ президентининг тарафдорлари митингга Грузия ва Украина байроқлари, шунингдек, Европа Иттифоқи байроқларини кўтариб келган.
ЯМҲ раиси Леван Хабеишвили партия номидан расмийларга бир қанча талаблар қўйди: Саакашвили ва унинг бир қанча шерикларини қамоқдан озод қилиш, деолигархизация (олигархларнинг ҳар қандай соҳага таъсирини чеклаш) тўғрисидаги қонунни қабул қилиш, суд тизими ва Марказий сайлов комиссиясини ислоҳ қилиш. Айнан мана шундай ислоҳотларни ўтказиш талабини Брюссел Грузиянинг Европа Иттифоқига кириши бўйича музокараларни давом эттириш учун илгари сураётганди.
Саакашвилининг қамоқ шифохонасидан ёзган мактуби
7 апрель куни Politico нашри Саакашвилининг мактубини чоп этди, унда сиёсатчи турма касалхонасида ўлаётгани ҳақида ёзган ҳамда АҚШ, Европа Иттифоқи ва халқаро ҳамжамиятни “ҳаётини сақлаб қолиш учун ҳамма нарсани қилишга” чақирган. Сиёсатчининг айтишича, ҳибсда у мунтазам равишда жисмоний ва руҳий қийноқларга дучор бўлган, оғир металлардан заҳарланиш аломатлари бор. Грузиянинг собиқ президенти 20 дан ортиқ оғир касалликлардан азият чекаётганини, уларнинг барчаси ҳибсда пайти ривожланганини айтди.
Саакашвилининг фикрича, унинг ўлими Кремль режимининг ғалабаси бўлади.
“Менинг ўлимим Грузияда сиёсий бетартибликни келтириб чиқариши мумкин, аммо қийноқда ўлишим шубҳасиз Путиннинг ғалабаси сифатида кўрилади — бу минтақадаги ва, эҳтимол, дунёнинг Россия империализмига қарши тура олмайдиган барча етакчилар учун қудратли рамзга айланади”, — деди Саакашвили.
Саакашвилини Грузияда ҳибсга олиш ва қийноқлар
2021 йил 1 октябрда Саакашвили саккиз йил ичида биринчи марта муниципал сайловлар арафасида Грузияга қайтганида ҳибсга олинган. У бир қанча жиноий ишларда, хусусан, 2005 йилда грузиялик собиқ депутат Валерий Гелашвилига ҳужум уюштирганликда айбланмоқда. Бунинг учун у аллақачон сиртдан олти йиллик қамоқ жазосига ҳукм қилинган.
Ҳибсга олингандан сўнг Саакашвили дарҳол очлик эълон қилган ва у 2021 йил 19 ноябрда очликни тўхтатишга рози бўлган. 29 ноябрь куни Саакашвили ҳибсга олинганидан кейин биринчи марта судга олиб борилган ва ҳибсда қийноққа солинганини айтган. У ўзига қўйилган айбловларни сиёсий таъқиб, ўзини эса сиёсий маҳбус деб билади.
Узоқ давом этган очлик эълонидан сўнг сиёсатчининг аҳволи оғирлашган, шу сабабли у Рустав қамоқхонасидан Горидаги ҳарбий госпиталга ўтказилган.
2022 йил декабрида Украина Ташқи ишлар вазирлиги ўша пайтда Тбилисидаги Вивамеди тиббиёт марказида бўлган Саакашвилининг соғлиғи сезиларли даражада ёмонлашганидан чуқур хавотирда эканини билдирган.
2023 йилнинг 1 февралида Украина президенти Владимир Зеленский Грузия ҳукумати Саакашвилини “омма олдида қийноққа солиб, ўлдираётганини” айтди. Саакашвилининг ўзи эса Украинадаги уруш ғалабасигача яшай олмаса, юрагини Киевга дафн этишга чақирди.
Изоҳ (0)