Америка Қўшма Штатлари Мудофаа вазирлиги 50 км дан 300 км гача парвоз қила оладиган бир марталик арзон дронларни сотиб олишни режалаштирмоқда. Бу ҳақда Defence News нашри хабар берди.
“Сўнгги можаролар арзон, бир марта ишлатиладиган дронларнинг замонавий жанг майдонига таъсирини кўрсатди. Мудофаа вазирлиги узоқ масофалардаги нишонларга зарба бериш учун арзон ва аниқ бошқариладиган қуроллардан фойдаланиш имкониятига эга бўлиши керак”, дейилади вазирлик баёнотида.
Defence News маълумотларига кўра, Пентагон таклиф қилинаётган дрон моделларини баҳолаш учун декабрь ойидаёқ кўргазмали парвозларини амалга оширишни режалаштирмоқда. Нашрнинг таъкидлашича, Америка мудофаа вазирлиги назарда тутаётган дронлар Украина ва Яқин Шарқда кўп миқдорда қўлланилади.
Мудофаа инновациялари департаментининг Defence News сайтига маълум қилишича, Пентагон электрон уруш, разведка, кузатув, шунингдек, алоқа соҳаларидаги вазифаларни бажаришга қодир дронлар ишлаб чиқаришдан манфаатдор. Бундай дронларни аниқлаш қийин, шунингдек, уларнинг парвозларни режалаштириш дастурлари билан жиҳозланганлиги ҳам муҳимдир.
Пентагон қанча дрон сотиб олишни режалаштираётгани ва уларнинг нархи қандай бўлиши мумкинлигига аниқлик киритмади. Биринчи навбатда таклиф этилаётган ҳар бир моделнинг ишлаш самарадорлигига эътибор қаратиш мақсад қилинган.
Изоҳ (0)