Украина ҳарбий дронлари 28 июль куни кечқурун Россиянинг Курск вилоятига ҳужум уюштирди. Бу ҳақда Шарқий Европа нашрларига таяниб, Reuters хабар берди.
Манбада айтилишича, Украина ҳужумни серияли тарзда амалга оширган, 20 дан ортиқ ҳарбий дронлар қўшни давлат ҳудудига киргач, Курск вилоятининг кўплаб ҳудудларини нишонга олган.
Расмийлар ҳужум оқибатида Курскдаги маҳаллий нефть омборига шикаст етказилганини хабар қилган. Омборнинг бир нечта қисмларида ёнғин келиб чиққан ва тезликда атрофга тарқала бошлаган. Қутқарув бригадалари ҳозирга қадар алангани ўчира олмаган.
Курск вилояти губернатори Андрей Смирнов дронлар ҳужуми рўй берганини тасдиқлаган. Тунги ҳужумнинг дастлабки соатларидаёқ 13 та дрон йўқ қилинган. Тонгга қадар эса ҳаво мудофаа тизимлари жами 19 та дронни уриб туширган. Вилоятда вазият тикланган.
Смирновнинг сўзларига кўра, ҳужумлар бир неча турар жой биноларига кичик зарар етказган. Аҳоли орасида шикастланишлар ва электр тармоқларида узилишлар йўй берган.
Манбада айтилишича, сўнгги пайтларда Украина Россия ҳудудидаги энергия иншоотлари, омборлар, транспорт ва ҳарбий инфратузилмага зарба беришни кўпайтирган. Бу ҳужумлардан мақсад эса Кремль иқтисодиёти ва урушни молиялаштириш қобилиятини йўқ қилишдир.
Украина дронлар ҳужуми душанба тонгида Орёл ва Брянск вилоятларида ҳам кузатилган. Орёлдаги ҳужумда минтақавий электр станциясига жиддий шикаст етган. Брянск вилоятида эса давлат муассасалари нишонга олинган.
Киев ҳукумати дрон ҳужумлари Россиянинг Украинани бомбардимон қилишда давом этишига қарши жавоб чораси эканини айтган. Россия тинч аҳолига ҳужум қилишни давом эттирса, Украина дрон ҳужумлари ҳам фаоллашиши хабар қилинган.
Изоҳ (0)