Германия Украинага навбатдаги ҳарбий ёрдам доирасида Helsing компанияси томонидан ишлаб чиқарилган сунъий интеллектга эга 4000 та дрон етказиб бермоқчи. Бу ҳақда Bild хабар берди.
Мини-Taurus номли учувчисиз учиш қурилмалари замонавий тизимларга эга. Бу эса уларни Россиянинг электрон уруш тизимларига қарши бардошли қилади. Бундан ташқари, дрон қийин об-ҳаво шароитида ҳам релефни таҳлил қилиш ва жойлашувни аниқлаш имконига эга.
“РБК Украина” нашри инсайдерларига кўра, декабрдан бошлаб ҳар ой бир неча юзлаб дронлар етказиб берилади. Ҳозир бир нечта намуналар Украина шарқида жанговар синовлардан ўтказилмоқда. Сунъий интеллект дронга оператор билан алоқа йўқолган тақдирда ҳам миссияни мустақил давом эттириш имконини беради. Бу эса зарбанинг аниқлилигини сезиларли даражада оширади.
Германия мудофаа вазири Борис Писториуснинг таъкидлашича, Украина ушбу дронлардан қўмондонлик пунктлари ва логистика марказлари каби муҳим нишонларга қарши самарали фойдаланиши мумкин. Вазир Германия келгусида Бундесверни ҳам худди шундай технологиялар билан таъминлашини айтди.
Германиянинг Украинага ҳарбий ёрдами
Германия Украинанинг донор давлатлари ичида Қўшма Штатлардан сўнг иккинчи ўринда туради. Биргина 2024 йил учун Германия бюджетидан Украинага ҳарбий ёрдамга 8 миллиард еврога яқин маблағ ажратилган. Мамлакат Украинани Леопард 2, Леопард 1А5 танклари, Marder пиёда жанговар машиналари ҳамда ИРИС-Т ҳаво мудофаа тизимлари билан таъминлаб келмоқда.
Изоҳ (0)