Жалолиддин Машарипов: “Қатар билан ҳисоб-китобимиз бор”

Жалолиддин Машарипов Ўзбекистон терма жамоасининг Қатарга қарши ўйини олдидан “Championat” сайтига берган интервьюсида учрашув борасида ўз фикрларини билдириб ўтди.

“Ўйлайманки, Қатар билан баҳс фаолиятимдаги энг муҳим учрашувлардан бири. Ушбу ўйинда ғалаба қозонсак, Жаҳон чемпионати масаласини 90 фоизга ҳал этамиз. Буни барча футболчилар тушуниб турибди. Худо хоҳласа, қўлимиздан келган барча нарсани ишга соламиз. Бундан ташқари, Қатар билан ҳисоб-китобимиз ҳам бор”, деди футболчи.

Машарипов мураббийнинг бирга экани қўшимча куч бериши ва ушбу баҳслар учун алоҳида мотивация керак эмаслигини таъкидлади.

“Унинг гапирадиган гапларини эшитиб туришга ўрганиб қолганмиз. У ёнимизда бўлса, бу биз учун яхши. Унинг келгани нафақат футболчилар, балки мухлисларни ҳам хурсанд қилди деб ўйлайман.

Менимча, ҳеч кимга мотивация зарур эмас, буни барча футболчилар англаб турибди. Худо хоҳласа, ҳаммамиз бор кучимизни бериб, шу йил ЖЧ йўлланмасини нақд қиламиз”, деди ярим ҳимоячи.

Бундан ташқари, футболчи “Истиқлол” таркибидаги сўнгги ўйинда шамоллагани боис иштирок этмагани ва ҳозирги ҳолати ҳақида маълум қилди.

“Охирги ўйиндан олдин туни билан иситмалаб чиқдим ва меҳмонхонада қолишимга тўғри келди. Мана ҳозир терма жамоа ихтиёрига етиб келдим. Озгина асоратлари бор. Худо хоҳласа, термамиз ўйинигача соғайиб кетаман деган умиддаман”, деди тажрибали футболчи.

Маълумот учун, Ўзбекистон терма жамоаси Жаҳон чемпионати саралашидан ўрин олган Қатарга қарши учрашувни 14 ноябрь куни бўлиб ўтади.

А гуруҳида ҳозирда 10 очко билан Эрон ва Ўзбекистон етакчилик қилмоқда. Қатар билан учрашувдаги ғалаба улар билан фарқни 9 очкога оширади.

19 ноябрь куни Ўзбекистон терма жамоаси Шимолий Корея меҳмони бўлади. Лаосда ўтиши режалаштирилган ушбу учрашув 2024 йилдаги саралашнинг сўнгги ўйини ҳисобланади. Баҳслар келгуси йил март ойидан давом эттирилади.

Жалолиддин Машарипов Эрон клуби таркибида барча мусобақаларни қўшиб ҳисоблаганда 21 бор майдонга тушди ва рақиблар дарвозасини икки бор ишғол қилди.

2016 йил Ўзбекистон миллий жамоасида дебют қилган ҳужумкор ярим ҳимоячи ҳозирга қадар 64 учрашувда қатнашди ва рақиблар дарвозасига 12 бор йўл топа олди.