Россия армияси Донецк вилоятидаги Покровский ва Кураховск йўналишларида ҳужум қилмоқда, фронтдаги вазият мураккаб. Бу ҳақда Украина Қуролли кучлари бош қўмондони Александр Сирский маълум қилди.
“АҚШ Қуролли кучларининг Европадаги қўмондони генерал Кристофер Каволи билан навбатдаги телефон орқали мулоқот қилдим. Вазият мураккаб бўлиб қолмоқда ва кескинлашиш тенденциясига эга. Душман сон жиҳатдан устунлигидан фойдаланиб, ҳужум ҳаракатларини давом эттирмоқда ва асосий саъй-ҳаракатларини Покровский ва Кураховск йўналишларига қаратмоқда”, деб ёзди Сирский ўзининг Telegram каналида.
Унинг таъкидлашича, Шимолий Корея аскарларини жанговар ҳаракатларда иштирок этишга тайёрлаш бўйича Украина армиясида кўплаб маълумотлар мавжуд.
“Мулоқот давомида Америка томони мудофаа кучларини қурол-яроғ ва ҳарбий техника билан таъминлаш бўйича ўз зиммасига олган мажбуриятларга қатъий риоя қилишини тасдиқлади”, дея аниқлик киритди УҚК раҳбари.
The Washington Post газетасининг қайд этишича, Россия армияси Украинанинг шарқий ҳудудларида мисли кўрилмаган тезликда илгариламоқда: қисқа муддат ичида 820 квадрат километрга яқин ҳудуд Россия Қуролли кучлари назорати остига ўтди. Қўшинлар кичик гуруҳлар тактикасини қўлламоқда, бу эса уларнинг аниқланиш эҳтимолини камайтириб, қарши чоралар кўришни қийинлаштирмоқда.
Изоҳ (0)