Шимолий Корея аскарлари ҳозирда Россия қўшинлари билан бирга Украинага қарши урушда қатнашмоқда. Бу ҳақда АҚШ Давлат департаменти матбуот хизмати хабар берди.
Қайд этилишича, Пхеньян томонидан Россия шарқига юборилган 10 мингдан ортиқ қўшиннинг асосий қисми Курск вилоятига жўнатилган.
“У ерда Шимолий Корея аскарлари Россия қуролли кучлари билан биргаликда жанговар ҳаракатларда қатнаша бошладилар”, деди департмент вакили.
Украина президенти Владимир Зеленский аввалроқ Шимолий Корея аскарлари Курск вилоятида Украина армиясига қарши жанговар ҳаракатларда иштирок этаётганини айтган.
“КХДРнинг 11 минг аскари ҳозирда Кремль қўшинларини қўллаб-қувватлаш учун Курскда бўлиб турибди ва улар орасида “талафот кўрганлар ҳам бор”, деб ёзган Зеленский.
Путин Курск вилоятини Трамп инаугурациясидан аввал қайтармоқчи
The Telegraph нашри Россия раҳбари Владимир Путин Украина армияси томонидан қисман эгаллаб олинган Курск вилоятини АҚШнинг сайланган президенти Дональд Трамп лавозимига киришгунча қайтариб олмоқчи экани ҳақида хабар берган эди.
Маълум қилинишича, Курск вилоятини 2025 йил 20 январгача, яъни Трампнинг инаугурациясигача қайтариб олиш режалаштирилган. Бундай қадам Москвага кучлироқ позиция билан тинчлик бўйича ҳар қандай музокараларга чиқишга имкон бериши кутилмоқда. Россия армияси 6 августдан бери Украина кучлари томонидан босиб олинган ҳудуднинг қарийб ярмини назорати остига олган.
Бир кун аввал Американинг The New York Times газетаси хабар беришича, умумий сони 50 минг кишидан иборат Россия ва Шимолий Корея ҳарбийлари гуруҳи Курск вилоятида қарши ҳужумга тайёрланмоқда. Жанубий Корея ва АҚШнинг ҳисоб-китобларига кўра, Украинага қарши урушда қатнашиш учун КХДРдан Россия Федерациясига 8 мингдан 12 минггача ҳарбий хизматчи олиб келинган.
Шимолий Корея Россия билан ҳамкорлик шартномасини ратификация қилди
11 ноябрь куни Шимолий Корея Россия билан кенг қамровли стратегик шериклик шартномасини ратификация қилди. Тегишли ҳужжатни КХДР етакчиси Ким Чен Ин имзолаган. Битим томонлардан бири бошқа давлат томонидан қуролли ҳужумга учраса ва шу тариқа уруш ҳолатига тушиб қолса, “барча воситалар билан” ҳарбий ва бошқа ёрдам кўрсатишни назарда тутади.
Изоҳ (0)