Шимолий Корея етакчиси Ким Чен Ин янги камикадзе ҳужумчи дронларини синовдан ўтказишни шахсан ўзи назорат қилиб, уларни оммавий ишлаб чиқаришни имкон қадар тезроқ бошлашни буюрди.
“Ким Чен Ин имкон қадар тезроқ серияли ишлаб чиқариш тизимини йўлга қўйиш ва тўлиқ ҳажмдаги оммавий ишлаб чиқаришга ўтиш зарурлигини таъкидлади”, дейилади хабарда.
Шимолий Корея етакчисининг таъкидлашича, дунё бўйлаб ҳарбий дронлардан фойдаланиш бўйича рақобат кучаймоқда.
“Бундай объектив ўзгаришлар ҳарбий назария, амалиёт ва таълимнинг кўплаб бўлимларини зудлик билан янгилашни талаб қилади”, дея таъкидлаган Ким.
Reuters: КХДР Жанубий Корея устидан дронлар учирди
Reuters хабарига кўра, КХДР Жанубий Корея устидан, хусусан, Сеул осмонида ва Жанубий Корея президенти Юн Сок Ёл идораси атрофидаги парвозлар тақиқланган ҳудудда дронлар учирди.
Шу муносабат билан Корея Республикаси дронларни уриб тушириш учун ҳаво мудофаа тизимини жойлаштиришга мажбур бўлди.
КХДР ва Россия ўртасида ҳар томонлама стратегик шериклик тўғрисидаги битим
Жорий йил 11 ноябрь куни Шимолий Корея Россия билан кенг қамровли стратегик шериклик шартномасини ратификация қилган эди. Тегишли ҳужжат Ким Чен Ин томонидан имзоланган. Россия ҳам уни олдин ратификация қилган.
Шартнома томонлардан бири бошқа давлат томонидан қуролли ҳужумга учраса ва шу тариқа уруш ҳолатига тушиб қолса, “барча воситалар билан” ҳарбий ва бошқа ёрдам кўрсатишни назарда тутади.
АҚШ Давлат департаменти: Шимолий Корея аскарлари аллақачон Украинага қарши урушда қатнашмоқда
АҚШ Давлат департаменти матбуот хизмати 12 ноябрь куни Шимолий Корея аскарлари аллақачон Украинага қарши урушда қатнашаётгани ҳақида хабар берган эди. Унга кўра, Пхеньян томонидан Россия шарқига юборилган 10 мингдан ортиқ аскарнинг аксарияти Курск вилоятига юборилган.
Американинг The New York Times нашри 50 минг кишилик Россия ва Шимолий Корея ҳарбий хизматчиларидан иборат гуруҳ Курск вилоятида қарши ҳужумга тайёргарлик кўраётгани ҳақида хабар берган эди. Жанубий Корея ва АҚШнинг ҳисоб-китобларига кўра, КХДРдан Россияга 8 мингдан 12 минггача ҳарбий хизматчи олиб келинган.
Изоҳ (0)