Украина президенти Владимир Зеленский разведка маълумотларига таяниб, Россиянинг Курск вилоятида 11 минг нафар Шимолий Кореядан келган ҳарбий борлигини айтди. Бу ҳақда “Украинская правда” хабар берди.
Бош разведка бошқармаси ва Ташқи разведка хизмати Россия ҳудудидаги Шимолий Корея ҳарбийлари бўйича алоҳида ҳисобот тақдим этди. Курск вилоятида уларнинг сони аллақачон 11 минг нафар. Биз шимолий кореяликларнинг сони кўпайиб бораётганини кўряпмиз, аммо ҳамкорларимизнинг бунга нисбатан муносабати кучайганини кўрмаяпмиз, деди Зеленский.
Россия Украина армиясига қарши КХДР ҳарбийларидан фойдаланиши ҳақидаги хабарларга муносабат билдирмаган. Бироқ президент Владимир Путин мамлакатда Шимолий Корея аскарлари борлигини тасдиқлаган. У КХДР билан стратегик ҳамкорлик тўғрисидаги шартномани эслатиб ўтган. Шунингдек, КХДР ҳарбийлари Россияда эканига ишора қилувчи сунъий йўлдош тасвирларига қуйидагича муносабат билдирган.
Суратлар — жиддий масала. Агар суратлар мавжуд бўлса, демак, улар ниманидир акс эттиради, деган Россия президенти.
Ўз навбатида, Шимолий Корея ҳарбийлари эвазига Россиядан йилига 700 минг тоннагача гуруч, космик технологиялар ва аскарлар учун 2000 доллардан ойлик талаб қилгани айтилмоқда. Икки давлат ўртасидаги келишувнинг муҳим банди шундан иборатки, КХДР ва қўшни мамлакатлар билан низо юзага келса, Россия у томонида жанг қилишни ваъда берган.
Изоҳ (0)