Италия президенти Сержо Маттарелла Ўзбекистонга ташриф буюради. Бу ҳақда Novа агентлиги хабар берди.
Хабарга кўра, Сержио Маттарелла Италиянинг Осиёдаги иштирокини ва ҳозирги халқаро панорамада катта стратегик аҳамиятга эга икки давлат билан ҳамкорликни мустаҳкамлаш мақсадида эртага, 6 ноябрь куни қўшалоқ миссия билан Жанубий Корея ва Ўзбекистонга жўнаб кетади.
Италия президентга давлат ташрифида унинг қизи Лаура ҳамда ташқи ишлар ва халқаро ҳамкорлик вазири ўринбосари Эдмондо Чириэлли ҳамроҳлик қилади. Маттарелланинг Сеулга ташрифи 7 ноябрь куни миллий қабристонга гул қўйиш маросими ва Корея Миллий музейида тўхташ билан бошланади.
8 ноябрь куни делегация Шимолий Корея билан чегарадаги қуролсизлантирилган Панмунжом қўшма хавфсизлик зонасига ташриф буюради. Бу зона Корея уруши (1950-1953) даврида Инчон-Сеул-Сувон учбурчагида тинч аҳолига ёрдам бериш учун дала касалхонасини ташкил этиш орқали халқаро гуманитар саъй-ҳаракатларга ҳисса қўшган Италия учун катта рамзий аҳамиятга эга.
Куннинг энг муҳим воқеаси Жанубий Корея президенти Юн Сук Ёл билан учрашув, сўнгра расмий делегациялар иштирокидаги музокаралар бўлади. Унда иқтисодиёт, аэрокосмик, фан, технология ва маданият соҳаларида ҳамкорликни мустаҳкамлаш, савдо ва яримўтказгичлар соҳасида ўзаро англашув меморандумларини имзолаш кўзда тутилган.
Шунингдек, халқаро миқёсдаги энг долзарб муаммолар, жумладан, Исроил-Фаластин можароси, Хитойнинг Жанубий Хитой денгизидаги қатъиятлилиги ва Украинадаги уруш кабилар муҳокама қилинади, бу мавзу Ўзбекистонга ташрифда ҳам қамраб олинади.
Италия президентининг Кореяга ташрифи 9 ноябрь куни ниҳоясига етиб, шу куни у Ўзбекистонга учиб кетади.
Тошкент билан ҳамкорлик Италия учун, айниқса, мамлакатнинг Европа ва Узоқ Шарқ, шунингдек, Россия ва Хитой каби йирик минтақавий давлатлар ўртасидаги тарихий боғланиш минтақасида жойлашган стратегик мавқейи туфайли алоҳида аҳамият касб этади.
“Айнан шу контекстда Рим Ўзбекистонга Ғарб билан муносабатларни мустаҳкамлашда ёрдам бериши мумкин”, — дейилади хабарда.
Президент Италия ва Ўзбекистон сармояларни ҳимоя қилиш ва илмий-маданий ҳамкорлик бўйича қатор музокараларда ҳам иштирок этади, Маттарелла 10 ноябрь куни Тошкентда ўзбекистонлик ҳамкасби Шавкат Мирзиёев билан учрашув ўтказиши режалаштирилган.
“Шу куни у Турин Политехниканинг маҳаллий штаб-квартирасида тўхташни режалаштирган, бу унга университетлар алмашинувини сарҳисоб қилиш ҳамда иқтисодий, технологик соҳалардаги ривожланиш ва ҳамкорликнинг янги салоҳиятли йўналишларини баҳолаш имконини беради”, — дейилади хабарда.
Ташриф 11 ноябрь куни Ўзбекистон ҳукумати муҳим сиёсий ва маданий марказга айлантиришга интилаётган ва Италия археологик миссияси билан иштирок этаётган Самарқанд шаҳрида якунланади.
Изоҳ (0)