Украина Жаҳон банкидан 1 миллиард доллардан ортиқ имтиёзли кредит ва Европа иттифоқидан 150 миллион евро олишни кутмоқда. Бу ҳақда бош вазир Денис Шмигаль ижтимоий тармоқларда маълум қилган.
“Украина Жаҳон банкидан 1 миллиард доллардан ортиқ имтиёзли кредит жалб қилади. Европа иттифоқидан эса 150 миллион евро олишни кутмоқдамиз”, деди у.
АҚШдан 1,35 млрд доллар миқдорида грант
Аввалроқ Шмигаль АҚШ Украинага Халқаро тараққиёт агентлиги орқали 1,35 миллиард доллар миқдорида грант ажратгани ҳақида хабар берган эди.
“Украина Америка Қўшма Штатларидан 1,35 миллиард долларлик грант олди. Биз бу маблағларни бирламчи гуманитар ва ижтимоий дастурларга йўналтирмоқдамиз. Ҳукуматимиз шу ва келгуси йилда ҳам зарур молиявий ресурсларни иттифоқчиларимиздан сафарбар қилишда давом этади”, дея таъкидлади у.
Буюк Британиядан йилига 3 млрд фунт стерлинг
11 сентябрь куни Украина бош вазири Денис Шмигаль Киевда Буюк Британия ташқи ишлар вазири Дэвид Лэмми билан учрашганди.
Учрашувдан кейин берган интервьюсида у Украина Буюк Британиядан йилига 3 млрд фунт стерлинг олишини айтиб ўтган.
“Буюк Британия Украинага йилига 3 миллиард фунт стерлинг миқдорида ҳарбий ёрдам кўрсатишда давом этади”, деди Шмигаль.
Унинг сўзларига кўра, мамлакатни қўллаб-қувватлаш бўйича ажратиладиган янги пакетга 162 миллион фунт стерлингли ҳаво ҳужумидан мудофаа ракеталари киради.
Шунингдек, энергетика соҳасини қўллаб-қувватлаш учун 30 миллион фунт стерлинг берилади.
Изоҳ (0)