АҚШ Конгрессининг Украинага янги ёрдам пакетини маъқуллашдаги кечикишлари Россия президенти Владимир Путинни фақат илҳомлантириши мумкин. Бу ҳақда Украина президенти Владимир Зеленский Вашингтондаги АҚШ Миллий мудофаа университетида қилган чиқишида гапирди.
“Агар Капитолий холдаги ҳал этилмаган муаммолардан кимдир илҳомланиши мумкин бўлса, бу Путин ва унинг касал мулозимлари. Улар кечикиш ва жанжалларга қараб, орзулари ҳақиқатга айланаётганини кўришади. Улар озодлик курашчиларини қўллаб-қувватлаш камайганини озодликнинг камайиши деб билади. Путинга ўхшаганлар озодликни мағлуб этишга умид ҳам қилмаслиги керак”, — деди Украина раҳбари.
Зеленский, шунингдек, Россия Украинани “озодликка қарши глобал уруш” учун трамплин сифатида қабул қилишини айтди.
Владимир Зеленский 11 декабрь куни АҚШга ташриф билан келди. Бу Россиянинг Украинага кенг кўламли босқини бошланганидан бери Украина президентининг Вашингтонга учинчи ташрифи бўлди.
Зеленский АҚШ Миллий мудофаа университетида нутқ сўзлашдан ташқари, Пентагон раҳбари Ллойд Остин, Америка ҳарбий компаниялари вакиллари, шунингдек, ХВЖ ва Жаҳон банки раҳбарияти билан учрашди. 12 декабрь куни Зеленский АҚШ президенти Жо Байден билан музокаралар ўтказади ва сенаторлар йиғилишида нутқ сўзлайди.
Зеленскийнинг ташрифи АҚШ Конгрессидаги ички сиёсий келишмовчиликлар ва Украинага янги ёрдамни молиялаштириш масаласида кечиктирилган қарорлар фонида амалга оширилмоқда. Байден маъмурияти Киев учун 60 миллиард доллардан кўпроқ ёрдам сўради, чунки илгари ажратилган маблағ поёнига етмоқда.
Изоҳ (0)