Украинани тиклаш бўйича конференция иштирокчилари мамлакатни урушдан кейин қайта тиклаш учун Киевга қўшимча 60 миллиард доллар юборишга ваъда берди. Бу ҳақда Лондондаги конференциянинг якуний ҳужжатига таяниб, Meduza ёзмоқда.
Хабарга кўра, бу суммага Европа Иттифоқи жамғармасидан 50 миллиард евро (54,8 миллиард доллар), АҚШ ваъда қилган 1,3 миллиард доллар ва Буюк Британиянинг уч миллиард долларлик кредит кафолати киради.
Швейцария 1,5 миллиард франк (1,68 миллиард доллар) миқдоридаги қўшимча ёрдамни эълон қилди. Ушбу маблағлар 2027 йилгача тақдим этилади. Ўз навбатида, Франция 2023 йилда Украинага яна 40 миллион евро (43,8 миллион доллар) ажратишини маълум қилган.
Бундан ташқари, 42 мамлакатдан 500 га яқин компания Украинанинг тикланишини қўллаб-қувватлашга ваъда берди.
“Бутун дунё компаниялари Украинанинг устувор тармоқларда, хусусан, энергетика, технология, инфратузилма ва молия соҳасида улкан салоҳиятини рўёбга чиқаришга ёрдам бериш, шунингдек, Украинада хусусий секторни ривожлантиришда ўз тажрибасини қўллаш учун ҳамкорлик қилишга келишиб олди”, — дейилади баёнотда.
Жаҳон банки маълумотларига кўра, Украинани урушдан кейин қайта қуриш учун камида 411 миллиард доллар керак бўлади. 2022 йилнинг ноябрида Украина президенти Владимир Зеленский мамлакатни тиклаш учун триллион доллардан ортиқ маблағ зарурлигини айтганди.
21–22 июнь кунлари Лондонда Украинани тиклаш бўйича навбатдаги конференция бўлиб ўтди. Тадбир Украинадаги ислоҳотларга бағишланган ва 2017 йилдан буён ўтказиб келинаётган йиллик конференцияларнинг давоми ҳисобланади.
Изоҳ (0)