Украинанинг валюта захиралари 2023 йилда Ғарбнинг молиявий ёрдами туфайли сезиларли даражада – 42 фоизга ошди: 1 январь ҳолатига кўра улар 40,5 миллиард долларни ташкил этди, дея хабар берди Украина Миллий банки.
“Ўтган йили Украина мисли кўрилмаган глобал молиявий ёрдам олди”, — дейилади Миллий банкнинг расмий веб-сайтида эълон қилинган хабарда.
Ўтган йили Киевга энг йирик донор Европа Иттифоқи бўлди: унинг улуши, Украина Миллий банки маълумотларига кўра, тахминан 18 миллиард еврони ташкил этди.
АҚШ, Япония, Буюк Британия ва бошқа бир қатор давлатлар Жаҳон банки фонди орқали жами 15 миллиард еврога яқин маблағ ўтказди. Киевга Халқаро валюта жамғармасидан 4 миллиард еврога яқин маблағ келиб тушган.
Reuters агентлигининг маълум қилишича, 2022 йил февраль ойи охиридан бери Украина 73,5 миллиард доллардан ортиқ молиявий ёрдам олган. Мамлакат ўз бюджети даромадларининг катта қисмини, масалан, солиқлардан келган тушумларни армияни молиялаштиришга сарфлайди. Украина ҳукуматига Ғарбдан пул биринчи навбатда пенсия, маош ва ижтимоий харажатларни тўлаш учун керак.
Январь ойида Брюсселда Европа Иттифоқининг навбатдан ташқари саммити ўтказилиши режалаштирилган, унинг иштирокчилари Украинани молиялаштириш масаласини яна муҳокама қилади.
Изоҳ (0)