Ukraina Jahon bankidan 1 milliard dollardan ortiq imtiyozli kredit va Yevropa ittifoqidan 150 million yevro olishni kutmoqda. Bu haqda bosh vazir Denis Shmigal ijtimoiy tarmoqlarda ma’lum qilgan.
“Ukraina Jahon bankidan 1 milliard dollardan ortiq imtiyozli kredit jalb qiladi. Yevropa ittifoqidan esa 150 million yevro olishni kutmoqdamiz”, dedi u.
AQSHdan 1,35 mlrd dollar miqdorida grant
Avvalroq Shmigal AQSH Ukrainaga Xalqaro taraqqiyot agentligi orqali 1,35 milliard dollar miqdorida grant ajratgani haqida xabar bergan edi.
“Ukraina Amerika Qo‘shma Shtatlaridan 1,35 milliard dollarlik grant oldi. Biz bu mablag‘larni birlamchi gumanitar va ijtimoiy dasturlarga yo‘naltirmoqdamiz. Hukumatimiz shu va kelgusi yilda ham zarur moliyaviy resurslarni ittifoqchilarimizdan safarbar qilishda davom etadi”, deya ta’kidladi u.
Buyuk Britaniyadan yiliga 3 mlrd funt sterling
11-sentyabr kuni Ukraina bosh vaziri Denis Shmigal Kiyevda Buyuk Britaniya tashqi ishlar vaziri Devid Lemmi bilan uchrashgandi.
Uchrashuvdan keyin bergan intervyusida u Ukraina Buyuk Britaniyadan yiliga 3 mlrd funt sterling olishini aytib o‘tgan.
“Buyuk Britaniya Ukrainaga yiliga 3 milliard funt sterling miqdorida harbiy yordam ko‘rsatishda davom etadi”, dedi Shmigal.
Uning so‘zlariga ko‘ra, mamlakatni qo‘llab-quvvatlash bo‘yicha ajratiladigan yangi paketga 162 million funt sterlingli havo hujumidan mudofaa raketalari kiradi.
Shuningdek, energetika sohasini qo‘llab-quvvatlash uchun 30 million funt sterling beriladi.
Izoh (0)