Жаҳон банки траст фонди орқали АҚШ йил охиригача Украинага яна 1,25 миллиард доллар ажратади. Бу пул ҳарбий ёрдамга эмас, балки аҳолининг заиф қатламларини, давлат хизматчилари, шифокорлар, ўқитувчилар ва қутқарувчиларни қўллаб-қувватлашга йўналтирилади. Бу ҳақда Украина Молия вазирлиги сайтида хабар берилди.
Тегишли протокол Жаҳон банкининг “Украинада барқарор давлат бошқарувини таъминлаш учун давлат харажатларини қўллаб-қувватлаш” лойиҳаси доирасида Америка грантини жалб қилиш бўйича музокаралардан сўнг имзоланди.
Жаҳон банки ва Украина Молия вазирлиги томонидан 26,6 миллиард долларга яқин 20 та қўшма лойиҳа амалга оширилмоқда, шундан қарийб 6,6 миллиард доллари кредит маблағлари, яна 20 миллиард доллари грант маблағларидир. Ушбу портфел ҳажми ҳамкорликнинг барча йилларидаги энг катта ҳажмга айланди.
Сентябрь ойи бошида Жаҳон банки Украинага уй-жойларни фавқулодда таъмирлаш учун 232 миллион доллар ажратди. Бундан олдин охирги марта Жаҳон банки Украинага 1,75 миллиард доллар миқдорида ёрдам ажратилишини эълон қилган эди.
Украина молия вазири Сергей Марченко келаси йили Украина ҳукумати АҚШдан 12–14 миллиард доллар миқдорида ёрдам сўрашини айтганди. Вазир буни Россия билан давом этаётган ҳарбий можаро шароитида бюджет харажатлари ҳамон юқорилиги билан изоҳлаган.
Изоҳ (0)