Украина йил бошидан буён 17 млрд долларга яқин ёрдам олди: қайси давлатлар кўпроқ пул ажратди?

Украина 2023 йил бошидан буён хорижий ҳамкорлардан 17 миллиард долларга яқин молиявий ёрдам олди. Мазкур маълумот мамлакат Молия вазирлиги томонидан эълон қилинди.

Жорий йилнинг беш ойидан камроқ вақт ичида Украина давлат бюджетини молиялаштиришнинг умумий ҳажми 841,6 миллиард гривна ёки 23 миллиард долларни ташкил қилган. Уларнинг 6,1 миллиард доллари давлат ички облигацияларини жойлаштириш орқали олинган.

Ўз навбатида, хорижий ҳамкорлар йил бошидан буён Украинага 16,9 млрд доллар ажратган. Хусусан, Европа Иттифоқи 6,5 миллиард доллар, АҚШ 4,75 миллиард доллар, Халқаро Валюта Жамғармаси  2,7 миллиард доллар, Канада 1,75 миллиард доллар ажратган.

Бундан ташқари, Жаҳон банки 505 миллион доллар, Буюк Британия 498 миллион доллар, Германия 52 миллион доллар, Испания 50 миллион доллар берган.

Маълумот ўрнида, Украинага жанговар ҳаракатлар оқибатида етган зарар 700 миллиард долларни ташкил этади, бу сумма мамлакат инфратузилмасига ҳужумлар оқибатида икки карра ўсган. 

Яқин орада Украинани Россия банкларидан мусодара қилинган маблағлар ҳисобидан қайта тиклашни бошлаш режалаштирилмоқда, бунинг учун махсус ҳисобда 17 миллиард гривна (462,5 миллион доллар) турибди.