АҚШ Федерал қидирув бюроси президентликка номзод Дональд Трампга қилинган ҳужумни суиқасд ва ички теракт сифатида текширмоқда. Сиёсатчини ўлдиришга уринишда айбланаётган 20 ёшли Томас Метю Крукс қариялар уйида ишлаган. Бу ҳақда CNN хабар берди.
Терговчилар йигитнинг ижтимоий тармоқларида ҳужум мотивларини кўрсатадиган ҳеч нарса топмаган. Томас Крукснинг телефони, милтиқ ва эҳтимолий портловчи мосламаси Федерал қидирув бюросининг (ФҚБ) Виржиния штати Квантико шаҳридаги лабораториясига юборилган.
Журналистларнинг сўзларига кўра, Крукс ота-онаси билан Пицбургнинг тинч чеккасидаги Бетел паркда, қотиллик содир бўлган жойдан тахминан 70 км узоқликда яшаган. 2022 йилда у мактабни математика ва табиий фанлар бўйича эришган натижалари учун 500 доллар мукофот билан тугатган. Крукс расман Республикачилар партияси тарафдори сифатида рўйхатга олинган.
Шу билан бирга, уч йил олдин у Демократик партияни қўллаб-қувватловчи АctBlue ташкилотига пул (атиги 15 доллар) хайрия қилган.
Маълум бўлишича, йигит Bethil Park Skilled Nursing and Rehabilitation Center қариялар уйида диeтолог ёрдамчиси бўлиб ишлаган. Ҳамширалардан бири журналистларга у ерда тинтув ўтказилганини айтган. Суиқасд пайтида Крукс миллионлаб обуначиларга эга бўлган, қурол ва портловчи қурилмалар видеосини жойлаштириладиган Demolition Ranch (YouTube канали) логотипи туширилган футболкада бўлган. Крукснинг шахсини йигитнинг отасига тегишли АР милтиғи ёрдамида аниқланган.
Томас Крукс ўқ узган қурол олти ойдан кўпроқ вақт олдин отаси томонидан қонуний равишда сотиб олинган. Отаси қуролни ўғлига берганми ёки Крукс уни рухсатсиз олганми, аниқ эмас. Ҳозирда оила тергов гуруҳи билан ҳамкорлик қилмоқда.
“Отишма содир этган шахснинг руҳий саломатлиги билан боғлиқ муаммолар борлиги ҳақида ҳеч қандай далил топилмаган. Бюронинг асосий вазифаси отишманинг мақсадини аниқлаш”, — дейди терроризмга қарши кураш бўлими директори ёрдамчиси Роберт Уэллс.
“Ҳозирда бизда мавжуд бўлган маълумотларга кўра, отишма содир этган эркак ёлғиз ўзи ҳаракат қилган ва ҳозирда жамоат хавфсизлигига ҳеч қандай таҳдид йўқ”, — дейди қотилликка уриниш бўйича терговга масъул агент Кевин Ройке.
Дональд Трампга суиқасд
АҚШнинг собиқ президенти Дональд Трамп 14 июль куни Пенсилваниянинг Батлер шаҳридаги сайловолди митинги пайтида яраланган эди. Ҳодиса акс этган видеода унинг чиқиши чоғида ўқ овозига ўхшаш товушлар эшитилган. Шундан сўнг Трамп қулоғини ушлаб ётиб олган. Қўриқчилар шу заҳоти Трампни ўраб олган. Президентликка номзод ўрнидан турганида қулоғидан қон оқаётганини кўриш мумкин. Махсус хизмат агентлари уни қуршаб олиб, кўтарилишга ёрдам берган ва саҳнадан олиб кетган.
Бу ҳодиса қотилликка уриниш сифатида баҳоланмоқда. Ўқ узган шахс махсус хизмат ходимлари томонидан ўлдирилган.
Айни пайтда сиёсатчининг аҳволи яхши экани айтилмоқда. АҚШнинг амалдаги президенти Жо Байден Трампнинг хавфсизликда эканини ҳамда ўзини яхши ҳис қилаётганини эшитганидан хурсандлигини билдирган. Ҳар икки йирик партиянинг америкалик сиёсатчилари Трампни қўллаб-қувватловчи ва сиёсий зўравонликни қораловчи баёнотлар билан чиқмоқда.
Изоҳ (0)