Россия Ташқи ишлар вазирлиги Севастополга ракета ҳужуми муносабати билан АҚШ элчиси Лин Трейсини чақиртирди. Унга “Вашингтоннинг қилмишлари жазосиз қолмаслиги” ваъда қилинган.
Россия ТИВ таъкидлашича, АҚШ “Қримдаги теракт учун Киев режими билан бирдек жавоб беради”. АҚШ Киевнинг Россия ҳудудига зарбаларини рағбатлантиргани учун Россия жавоб чораларини кўради, дея таъкидлади ТИВ.
“Россияга қарши гибрид уруш олиб бораётган ва аслида можаро тарафига айланган Қўшма Штатлар Украина Қуролли кучларини энг замонавий қурол-яроғлар, жумладан, Россия аҳолисига қарши ишлатиладиган кассетали ATACMS ракеталари билан таъминлаётгани таъкидланади. Нишон олиш ва учиш миссияларини америкалик ҳарбий мутахассислар амалга ошираётгани туфайли улар бу жиноят учун Киев режими билан тенг жавобгарликка тортилади”, — дейилади Россия ТИВ баёнотида.
Кеча, 23 июнь куни Севастополга кассетали каллаклар билан жиҳозланган бешта Америка ATACMS ракетаси ҳужум қилгани Россия томонидан хабар берилди.
“Ракета ҳужумини қайтариш пайтида Россия ҳаво мудофааси тўртта ракетани тутиб олди. Бешинчи ракетанинг парчаланган жанговар каллаги Севастополдаги пляж устида портлади. Охирги маълумотларга кўра, 153 киши турли даражадаги тан жароҳатлари олган. Тўрт киши вафот этган", — дейилади Россия Мудофаа вазирлиги хабарида.
Кремль матбуот котиби Дмитрий Песков ушбу зарбани шарҳлар экан, Владимир Путиннинг яқинда Россия “технологик жиҳатдан мураккаб ракеталарни” ким бошқараётганини билади, деган сўнгги баёнотини эсга олди.
“Булар украиналиклар эмас. Сиз ОАВ вакиллари сифатида Европадаги, айниқса, Вашингтондаги ҳамкасбларим, матбуот котиблари билан боғланиб, улардан нима учун уларнинг ҳукумати рус болаларини ўлдираётганини сўранг”, — деди Песков.
Изоҳ (0)