Конго Демократик Республикасининг шарқида 4 май куни теракт уюштирилиши оқибатида камида 12 нафар фуқаро ҳалок бўлган. Бу ҳақда Al Jazeera нашри хабар берди.
Манбада айтилишича, теракт мамлакат шарқий қисмидаги кўчирилганлар лагерида юз берган. Конго ҳукумати ва мамлакатдаги АҚШ расмийлари Руанда армияси ва М23 исёнчи гуруҳини терактни уюштиришда айблаган.
Ҳужумлар лагернинг иккита ҳудудида содир этилгани айтилган. Портлаш ҳудуднинг асосан аёллар ва болалар истиқомат қиладиган қисмларида юз берган.
Теракт юз берган Шимолий Киву провинцияси ҳудудида хавфсизлик чоралари кучайтирилган. Гома шаҳри яқинидаги Лак Верт ва Мугунга лагерлари ҳудудига хавфсизлик отрядлари киритилган.
Мамлакат расмийлари камида 20 киши яраланганини билдиришган. Ҳужумлар инсон ҳуқуқлари ва халқаро гуманитар ҳуқуқнинг қўпол равишда бузилиши ва уруш жинояти эканлиги айтилган.
Лагерлардан бирида истиқомат қилувчи Al Jazeera мухбирининг айтишича, ҳудудга ҳужум қилинганда қурбонларнинг кўпчилиги ўз чодирларида ухлаётган бўлган.
4 май куни Руанда ҳукумати мамлакатнинг терактга алоқадорлиги борасидаги айбловга муносабат билдирирб, буни бемаънилик деб атаган. Руанда ҳукумати матбуот котиби Ёланде Маколо мамлакат мудофаа кучлари ҳеч қачон кўчирилган фуқароларга ҳужум қилмайдиган “профессионал армия” эканлигини билдирган.
Манбада айтилишича, ҳозирда Конго Демократик Республикасига қарашли Шимолий Киву ҳудудининг катта қисмини М23 исёнчи гуруҳи эгаллаб олган. Аммо сўнгги ҳафталарда уларнинг қочқинлар лагерига ҳужуми кузатилмаётгани билдирилган.
БМТ ва Ғарб давлатлари Руанда конлар ва минерал ресурсларни назорат қилиш мақсадида М23 исёнчи гуруҳини қўллаб-қувватлашини маълум қилган. Руанда бу айбловни ҳам рад этган.
Изоҳ (0)