АҚШнинг Европадаги бир қатор ҳарбий базалари юқори шай ҳолатга келтирилди, хавфсизлик даражаси АҚШ қўшинлари ёки иншоотлари террористик ҳужумга дучор бўлиши мумкинлигидан хавотирлар фонида иккинчи энг юқори даражага кўтарилди. Бу ҳақда исми ошкор этилмаган икки америкалик расмийга таяниб, CNN хабар берди.
Германиянинг Штутгарт шаҳридаги АҚШ армияси гарнизонининг жанговар тайёргарлиги “Чарли” ҳолатига келтирилган. Бу террористик ҳужумлар эҳтимолини кўрсатадиган разведка маълумотлари олинганда қўлланилади. Икки АҚШ расмийсига кўра, эҳтимолий теракт америкалик ҳарбий хизматчилар ва ҳарбий объектларни нишонга олишни назарда тутади. CNN манбаларидан бири бундай даражадаги таҳдид камида ўн йил давомида содир бўлмаганини таъкидлади.
Пентагон муносабати
АҚШ Мудофаа вазирлиги қўшинлар хавфсизлигини таъминлаш учун тез-тез қўшимча хавфсизлик чораларини кўришини билдирди. Пентагон Европадаги бир неча ҳарбий базалар эҳтимолий терактлар хавфи туфайли юқори шай ҳолатга келтирилгани ҳақидаги маълумотга шундай жавоб берди. АҚШ Европа қўмондонлиги матбуот котиби Ден Дай эса бунга муносабат билдирмади.
Изоҳ (0)